Túrkistan oblysynda polıtseı sýǵa batqan boıjetkendi qutqaryp qaldy
ShÁÝІLDІR. QazAqparat - Túrkistan oblysy, Otyrar aýdanynda ózine qol salmaq bolǵan boıjetken qutqaryldy. Ol úlken kanaldyń kópirinen sýǵa sekirip ketken, dep habarlaıdy QazAqparat tilshisi.
Keleńsiz jaǵdaı Otyrar aýdanynda oryn alǵan. Boıjetkenniń sýǵa sekirmek bolǵan áreketin kórgen belgisiz adamdar birden polıtsııaǵa habar beredi. Oqıǵa ornyna jetken polıtsııa aǵa serjanty Raqymjan Nııazbekuly eshteńege qaramastan sýǵa súńgip ketedi. Shapshańdyq tanytyp, sý túbine batyp bara jatqan boıjetkendi qutqaryp qalady. Biraz ýaqyt sýmen arpalysyp júrip, sý jutyp qoıǵan qyzdy shyǵaryp alǵan. Ol jedel járdemniń kómegimen birden aýrýhanaǵa jetkizilgen. Jansaqtaý bólimine túsken qyz emdelip, birshama kúnnen keıin aman-esen úıine shyǵarylǵan. Qazirgi ýaqytta otbasymen birge.
Óz kezeginde órimdeı qyzdy ajaldan aman alyp qalý úshin óz ómirin qaterge tikken polıtseıge boıjetken men onyń otbasy alǵys aıtty.
