Túrkistan oblysynda paıdalanylmaı jatqan 47 myń gektar jer memleket menshigine qaıtarylǵan
TÚRKІSTAN. QazAqparat - Aýyl sharýashylyǵy maqsatyndaǵy jerlerge júrgizilgen túgendeý jumystary barysynda Túrkistan oblysy boıynsha byltyr 659 jer ıeleriniń 86 myń gektar aýyl sharýashylyǵy maqsatyndaǵy jerleri paıdalanylmaı jatqandyǵy anyqtalǵan, dep habarlaıdy Túrkistan oblysynyń Óńirlik kommýnıkatsııalar qyzmeti.
Onyń 8,2 myń gektary - egistik, 4,7 myń gektary – sýarmaly, 77,8 myń gektary - jaıylymdyq jerge tıesili. Bul týraly Túrkistan oblysynyń jer qatynastary basqarmasynyń basshysy Samat Ramazanov óńirlik kommýnıkatsııalar qyzmetinde ótken baspasóz máslıhatynda málimdedi.
Paıdalanylmaı jatqan 203 jer ıesi 47,1 myń ga jerdi óz erikterimen memleket menshigine qaıtarsa, 82 jer ıesi 8,6 myń ga jerdi qaıta ıgerýge kirisken. Sondaı-aq, 374 jer ıesiniń 30,3 myń ga jerin aýdan, qala ákimdikteri tarapynan memleket menshigine qaıtarý sharalary júrgizilýde.
«Túrkistan oblysy ákiminiń tapsyrmasyna sáıkes, 2021 jylǵa arnalǵan jaıylym jerlerdi qaıtarýdyń 5 baǵyttyq qadamdyq algorıtmi ázirlendi. Algorıtm boıynsha birinshi kezekte jaıylym tapshylyǵy oryn alǵan 152 eldi mekender mańyndaǵy halyqtyń muqtajyna alynatyn ýchaskeler anyqtaldy. Bıyl 129,6 myń ga jaıylymdyq jerlerdi halyqtyń muqtajyna alý josparlanýda. Jyldyń sońyna deıin jaıylym jerdiń kólemi 741,8 myń gektarǵa arttyrý josparlanýda»,-dedi Samat Maratuly.
Sonymen qatar, byltyr jeke turǵyn úı qurylysyn júrgizý úshin jer telimin alýǵa 119 044 azamat kezekke tirkelgen. Negizinen, kezekte turǵan azamattardyń basym bóligi Túrkistan qalasy, Saıram, Saryaǵash jáne Keles aýdandarynyń turǵyndary. 2020 jyldyń qorytyndysymen jalpy 301 jer telimń kezekte turǵan azamatqa berilgen.
