Túrkistan oblysynda parkıonson dertine qarsy alǵashqy ortazııalyq konferentsııa ótti
TÚRKІSTAN. QazAqparat - Túrkistan oblysynda parkıonson dertine qarsy alǵashqy ortazııalyq konferentsııa ótti, dep habarlaıdy QazAqparat tilshisi.
Jıynǵa otandyq dárigerlermen qatar Ispanııa, Anglııa, Túrkııa jáne Ózbekstan elderinen kelgen medıtsına salasyndaǵy bilikti mamandar qatysyp, óz tájirıbelerimen bólisti.
Sondaı-aq olar Shymkenttegi medıtsına akademııasynyń stýdentterimen kezdesip, oblystyq aýrýhanada atalmysh dertke shaldyqqan azamattardy qabyldady.
Statıstıkalyq málimetterge súıensek, qazirgi tańda óńirde bul aýrýdyń orta eseppen taralýy 100 myńǵa shaqqanda 35 adamǵa jetip otyr. Nevrologtar derttiń bul túri neǵurlym erte anyqtalsa, ony emdeý de jeńil bolatynyn aıtady. Saýatty jasalǵan dıagnostıka men durys taǵaıyndalǵan em naýqastardy múgedektikten saqtap qalýǵa, olardyń belsendi ómir súrýine múmkindik beredi dep otyr.
«Búgingi tańda parkınson aýrýyn oıdaǵydaı emdeýge bolady. Ony joǵary deńgeıde emdeýde ǵalymdar jańa tásilder oılap tabýda. Bul derttiń 10 paıyzǵa jýyǵy tuqym qýalaıdy. Dál osy baǵytta biz qazirgi tańda úlken jumys atqaryp jatyrmyz. Eger dári-dármek durys tańdalyp, em der kezinde taǵaıyndalsa, aýrýdyń bastapqy satysynda jaqsy nátıje beredi. Al, dári kómektespeıtin syrqattarǵa neırohırýrgııalyq em men neırońaltý tásili qoldanylady»,- deıdi oblystyń bas nevrology Názıra Asanqyzy.
Búginde qazaqstandyq dárigerler joǵary tehnologııaly neırohırýrgııalyq ota jasaýdy úırendi. Jergilikti dárigerlerdiń biliktiligin arttyrý maqsatynda uıymdastyrylǵan konferentsııada oblystyq klınıkalyq aýrýhana men Túrkııa memleketiniń ǵalymdary arasynda yntymaqtastyq memorandýmǵa qol qoıyldy.
«Oblysta shetel mamandarynyń kómegimen osy aýrýdy emdeıtin dıagnostıkalyq ortalyq ashsaq degen oıymyz bar. Bul baǵytta otandyq medıtsına emdeýdiń jańa zamanaýı tásilderin usynyp otyr»,- deıdi oblystyq Densaýlyq saqtaý basqarmasynyń basshysy Muqan Egizbaev.
