Túrkistan oblysynda parakanoeden elimizdiń ashyq birinshiligi ótip jatyr
TÚRKІSTAN. QazAqparat - Túrkistan oblysyndaǵy Badam sý qoımasynda múmkindigi shekteýli jandar arasynda eskek esýden Qazaqstan Respýblıkasynyń ashyq kýbogy ótýde. Bıyl ekinshi ret uıymdastyrylǵan halyqaralyq básekege elimizben qatar Reseı, Ózbekstan, Tájikstannan kelgen sportshylar qatysyp otyr, dep habarlaıdy QazAqparat tilshisi.
Dástúrli jarystyń saltanatty ashylý rásimine Kanada elinen kelgen parakanoeniń negizin qalaýshy jáne álem boıynsha kanoe federatsııasynyń prezıdenti Djon Edvadts arnaıy qatysyp, sportshylarǵa sáttilik tiledi. Múmkindigi shekteýli jandar arasynda uıymdastyrylǵan jarysqa 4 memleketten 70-ke jýyq sportshy qatysyp, myqtylaryn anyqtaýda. 200 metr qashyqtyqta synǵa túsken sportshylardyń esimderi belgili boldy.
Tartysty ótken básekede ózbekstandyq Pavel Sýleımanov máre syzyǵyn birinshi bolyp kesse, júldeli ekinshi oryn Túrkistan oblysynyń namysyn qorǵaǵan Jalǵas Taıkenovqa buıyrdy. Al, úshinshi oryndy ózbek eliniń sportshysy Ozodbek Hývaedýllaev ıemdendi. Jastar arasyndaǵy 200 metr qashyqtyqta baq synaǵan qos túrkistandyq sportshylar júldeli oryndardy bólisti. Jarysta Polad Týrebekov jeńimpaz atansa, ekinshi oryn Ádilet Baqytulyna berildi.
Aıta keteıik, jeńimpaz atanǵan sportshylar Majarstanda ótetin álem chempıonatynda baq synaıdy.
