Túrkistan oblysynda para aldy degen kúdikpen basqarma basshysy ustaldy

ASTANA. QazAqparat - Túrkistan oblysy ákimdiginiń memlekettik sáýlet-qurylys basqarmasynyń basshysy paraqorlyq qylmysyna qatysty kúdikti dep tanylýda, dep habarlaıdy QazAqparat tilshisi.

«Sybaılas jemqorlyqqa qarsy is-qımyl ulttyq bıýrosynyń Túrkistan oblysy boıynsha departamentiniń arnaıy jedel izdestirý sharalary barysynda, oblys ákimdiginiń memlekettik sáýlet-qurylys baqylaý basqarmasynyń basshysy jáne atalǵan basqarmanyń lıtsenzııalaý bólimi basshysyna qatysty paraqorlyq faktisi anyqtaldy. Olar JShS dırektory orynbasarynyń járdem berýimen «B» degen azamattan seriktestiktiń zertteýshilik qyzmetpen aınalysýyna uajetti memlekettik lıtsenzııa berý úshin 380 myń teńge somasynda júıeli negizde para alyp otyrǵan dep kúdik keltirilip otyr», - deıdi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń qoǵammen baılanys jónindegi departamentiniń dırektory Arman Berdalın Agenttikte ótken baspasóz máslıhatynda.

Onyń habarlaýynsha, osy jyldyń 27 aqpanynda basqarma basshysy jáne onyń járdem berýshi - JShS dırektory orynbasary ustalyp, Túrkistan men Kentaý qalasy Polıtsııa basqarmasynyń ýaqytsha ustaý abaqtysyna toǵytylǵan.

Kinásin tolyq moıyndaýyna baılanysty bólim basshysyna qatysty protsessýaldyq ustaý sharasy qoldanylǵan joq. Tergeý jalǵasýda.