Túrkistan oblysynda pandemııamen kúres kúsheıtiledi
TÚRKІSTAN. QazAqparat – Túrkistan oblysynyń ákimi Ómirzaq Shókeevtiń tóraǵalyǵymen ótken lezdemelik májiliste koronavırýs ınfektsııasymen kúres jumystarynyń barysy baıandaldy. Aımaq basshysy oblys aýmaǵynda pandemııamen kúres jumystaryn kúsheıtýdi tapsyrdy, dep habarlaıdy QazAqparat tilshisi.
Sońǵy málimetter boıynsha, óńirde koronavırýs ınfektsııasynyń rastalǵan 832 jaǵdaıy tirkelip, aýrýdyń órshýi oryn alyp otyr. Saýyǵyp shyqqandar sany - 335. Іndet oblystyń barlyq aýmaǵynda tirkelgen.
Jalpy, ınfektsııalyq statsıonarlarda 365 tósek-oryn, provızorlyq statsıonarlarda 1305 tósek-oryn, karantındik ortalyqtarda 1185 tósek-oryn uıymdastyrylǵan. Táýligine 650 test jasaýǵa qaýharly 4 zerthana jumys isteıdi.
«Aımaqta jaǵdaı óte kúrdeli. Barlyq aýdanda indetpen kúres maqsatynda tıisti sharalardy qoldanýymyz qajet. Naýqastar aýrýhanalarda oryn jáne dári-dármek tapshylyǵynan qınalmaýy kerek. Eń bastysy, qazirgideı qıyn sátte oblystyń barlyq aýdan-qalalarynda jáne árbir eldi mekenderde karantındik shekteý rejımin kúsheıtip, talapty qatań túrde saqtaýdy tapsyramyn. Atap aıtqanda, turǵyndardyń kóshege tek betperdemen shyǵýyn jáne halyq kóp shoǵyrlanatyn oryndarda mindetti áleýmettik araqashyqtyqty qatań saqtaýdy qamtamasyz etip, oblysta qurylǵan mobıldi toptardyń jumysy jandandyrylyp, júıeli túrde júrgizilsin. Shekteý sharalaryn elemeı, zań buzýshylyqtarǵa jol bergen jeke jáne zańdy tulǵalarǵa túsindirý sharalary, zańnamaǵa sáıkes sharalar qabyldanǵany jóninde buqaralyq aqparat quraldarynda jáne áleýmettik messendjerlerde keńinen habarlap otyrýdy tapsyramyn», - dedi Ómirzaq Shókeev.
Karantın rejımi kezinde qyzmetin júzege asyratyn nysandarǵa tekserý júrgizý algorıtmine sáıkes Túrkistan oblysy aýmaǵynda 71 top jasaqtalǵan. 6229 nysan tekserilip, karantın talaptaryn buzǵan 1269 nysanǵa eskertý aktileri berilgen. Eskertý aktileri berilgenimen, karantın talaptaryn qaıta buzǵan 67 nysanǵa ákimshilik quqyq buzýshylyq hattama toltyryldy. Onyń ishinde 45-i jergilikti atqarýshy sot organdaryna joldanyp, sottyń sheshimimen 2 jeke tulǵaǵa 5 AEK jáne 2 jeke kásipkerge 100 AEK esebinde aıyppul salynǵan. Atqarylǵan jumystar týraly Ómirzaq Shókeevke ári qaraı da júıeli málimetter usynylady. Aımaq basshysy atalǵan jumystardyń júzege asýyna aýdan, qala ákimderi men basqarma basshylarynyń tikeleı jaýapty ekendikterin eskertti. Oblys aýmaǵynda koronavırýs ınfektsııasymen kúres jumystarynyń barysy qarastyrylǵan apparat májilisinde Maqtaaral jáne Tóle bı aýdandaryndaǵy tótenshe jaǵdaıdyń saldaryn joıý jumystary men osal toptaǵy azamattarǵa kórsetilip otyrǵan áleýmettik qoldaý jumystarynyń barysy týraly da baıandaldy.
