Túrkistan oblysynda pandemııa kezinde tyń jobalar qolǵa alyna bastady

«Nur Otan» partııasy Túrkistan oblystyq fılıalynyń uıymdastyrýymen júzege asyrylatyn jańa jobany «Jas Otan» jastar qanaty jáne oblystyq «Jastar resýrstyq ortalyǵy» janynan qurylǵan «Jas Turkistan» eriktiler qozǵalysy úılestiretin bolady, dep habarlaıdy QazAqparat tilshisi.

Búgin Túrkistan oblystyq qoǵamdyq densaýlyq basqarmasynyń ǵımaratynda osy jobalardy júzege asyrý resmı túrde bastaldy. Atalǵan basqarmaǵa Túrkııadan ákelingen eki jasandy tynys alý apparaty usynylsa, 20-dan astam naýqasqa shaldyqqan muqtaj otbasylarǵa dári-dármek tapsyryldy. Apparatty jetkizýge atsalysqan Qazaqstannyń Túrkııadaǵy elshiligi men elshisi Abzal Saparbekulyna alǵys aıtyldy.

«ÓMІR» jobasy elimizde tapshy bolyp otyrǵan ottegi apparattaryn shet memleketterden óńirimizdegi emhanalarǵa jetkizý maqsatynda qolǵa alynyp otyr. Al, «ShIPA» jobasy arqyly orta deńgeıdegi dári-dármekter qorapshasyn daıyndap, ony aýyl-aýdandardaǵy áleýmettik jaǵdaıy tómen jáne de az qamtylǵan kópbalaly otbasylarǵa otbasylarǵa taratý kózdelgen. Osy jobalardy júzege asyrý úshin el janashyrlary, oblystyq máslıhattaǵy «Nur Otan» partııasynyń fraktsııa ókilderi men ózge de azamattar qoldaý kórsetip otyr.

Qazirdiń ózinde qorǵa 10 mıllıon teńgeden astam qarjy jınalǵan. Bul qarjynyń bir bóligine Túrkııa jáne Qytaı elderine 50 jasandy tynys alý apparatyna tapsyrys berilip, olar aldaǵy aptada óńirge jetkiziledi. Sonymen birge ázirge 300 dári-dármek qorapshasyn elge taratý kózdelgen. Árbir dári qorapshasynyń quny 14-15 myń teńge kóleminde bolmaq. Qorapsha ishinde Túrkistan oblysy qoǵamdyq densaýlyq basqarmasy tarapynan usynylǵan ári qazir beleń alyp otyrǵan koronavırýs pen pnevmonııa indetiniń aldyn alýǵa, emdelýge arnalǵan dáriler men preparattar bar. Alǵashqy eki jasandy tynys alý apparatyn alýǵa demeýshilik kórsetken «Nur Otan» partııasynyń Túrkistan oblystyq fılıaly tóraǵasynyń birinshi orynbasary Beısenbaı Tájibaev bul jobalar óńirdegi jas eriktilerdi ıgi iske jumyldyryp otyrǵanyn jetkizdi.

«Qazir elimizde koronavırýs indeti keń taralyp, el qınalyp jatyr. Naýqastar sany da artyp keledi. Túrkistan oblysynda COVID-19 rastalǵan naýqastar sany 2370-ten asty. Ókinishke qaraı, jasandy tynys alý apparattary men dári-dármek jetispeýshiligi de baıqalyp otyr. Sondyqtan da partııa bastamasymen óńirdiń belsendi jastardan quralǵan «Jas Turkistan» eriktiler qozǵalysy qurylyp, osy jobalardy bastap ketti. Bul jumystar oblystyq qoǵamdyq densaýlyq basqarmasymen de birlesip atqarylady. Igi bastamaǵa partııa ókilderi, máslıhat depýtattary qoldaý kórsetip jatyr. Pandemııamen kúreste, muqtaj otbasylarǵa kómektesýde atalǵan jobalar tıimdiligin kórsetedi dep senemin. Osy qıyn kezeńde elge kómektesýge barsha azamattardy atsalysýǵa shaqyramyz», – dedi B.Tájibaev.

Jalpy bul jobaǵa qazir oblystyq máslıhat depýtattary – Nuraly Ábish (5 mln. teńge), Almas Salımov (1 mln. teńge), Jańabaı Aǵabekov (1 mln. teńge), Maǵaýııa Turysbekov (875 myń teńge), Qaınar Abbasov (767 myń teńge), Baımahan Súleımenov (200 myń teńge) aýdardy. Sonymen birge Jazıra Ydyrysova (1 mln. 50 myń teńge) men Inara Namazbaeva (400 myń teńge) syndy el janashyrlary da qarjylaı qoldaý kórsetip otyr. Óńirdegi volonter jastar sonymen birge aýrýhanalardaǵy naýqastarǵa saýmal men qymyz jáne azyq-túlik jetkizýdi qolǵa aldy.

Túrkistan oblystyq «Jastar resýrstyq ortalyǵynyń» dırektory Amalbek Ómirtaı men «Jas Otan» jastar qanatynyń Túrkistan oblystyq fılıalynyń tóraǵasy Janserik Juman jobalardy júzege asyrýǵa aýyl-aımaqtardaǵy jastar da úles qosatynyna senim bildirip, saýapty is tutas oblysty qamtıtynyn jetkizdi.