Túrkistan oblysynda ózennen adamnyń máıiti tabyldy
TÚRKІSTAN. QazAqparat – Túrkistan oblysy, Tólebı aýdanynda Aqsý ózeninen adamnyń máıiti tabyldy. Qazir osy oqıǵa boıynsha tergeý júrip jatyr, dep habarlaıdy QazAqparat Polisia.kz Telegram kanalyna silteme jasap.
Ondaǵy málimetterge qaraǵanda, 10 qazan kúni Túrkistan oblysynyń Tólebı aýdany Polıtsııa basqarmasynyń kezekshi bólimine óńirdiń Tótenshe jaǵdaılar departamentinen Aqsý ózeninen belgisiz máıittiń tabylǵany týraly habarlama kelip tústi.
Oqıǵa ornyna dereý aýdandyq polıtsııa bóliminiń jedel-tergeý toby shyqty.
Ózenniń oń jaǵalaýynan tabylǵan máıittiń sýda uzaq turýyna baılanysty tekserý kezinde ony taný múmkin bolmaǵan. Máıitke tez arada saraptama taǵaıyndalyp, onyń qorytyndysyna sáıkes áıelge tıesili ekendigi anyqtaldy.
«Bul jaıt Tólebı APB-da tirkeldi. Qazirgi ýaqytta sotqa deıingi tergeý jumystary júrip jatyr jáne bolǵan oqıǵanyń mán-jaıy anyqtalýda»,-delingen habarlamada.
