Túrkistan oblysynda ózen, kólder men sý qoımalary baqylaýda
Bul týraly tótenshe jaǵdaılar departamentiniń basshysy Nurǵalı Júnisov óńirlik kommýnıkatsııalar qyzmetinde ótken baspasóz máslıhatynda málimdedi, dep habarlaıdy QazAqparat tilshisi.
Nurǵalı Júnisovtyń aıtýynsha, búgingi tańda Syr ózeniniń arnasynda sýdyń aǵysy qalypty. Ózennen bastaý alatyn kanaldardyń eldi mekenderge qaýpi joq. Óńirde jalpy sany 40 sý qoımasy ornalasqan bolsa, olardyń arasynda eshbiri qaraýsyz qalmaǵan. Qazirgi tańda Shardara sý qoımasynyń tolýy 77%, Kóksaraı sý rettegishiniń tolýy 37 % quraıdy.
«Syrdarııa ózeni aýmaǵynda ornalasqan eldi mekenderdegi dambalardy qaıta zerdeleý jumystary júrgizildi. Barlyq sý qoımalary men ózen sýlary departament qyzmetkerleriniń kúndelikti baqylaýynda. Kóktemgi sý tasqyny qaýipti maýsymda departamenttiń jalpy 284 jeke quramy men 34 birlik tehnıka, 12 dana qaıyq pen 35 dana motopompa daıyndyqqa keltirilgen»,-dedi departament basshysy.
Sondaı-aq, tótenshe jaǵdalar salasynyń ókilderi turǵyndardy ıisti gazdan ýlanýdan saqtanyp, órt qaýipsizdik sharalaryn qatań saqtaýdy eskertedi. Negizinen jyl basynan bastap oblys aýmaǵynda 59 órt deregi tirkeldi. Órtten 143 mln. 370 myń teńge materıaldyq shyǵyn keltirilgen.