Túrkistan oblysynda oınap júrip joǵalyp ketken bir úıdiń 4 balasy tabyldy
KELES. QazAqparat - Túrkistan oblysynyń polıtseıleri joǵalǵan tórt birdeı balany taýyp, ata-anasyna tapsyrdy, dep habarlaıdy QazAqparat.
Keles aýdandyq polıtsııa bólimine jergilikti turǵyn habarlasyp, tez arada kómek kerek bolyp turǵanyn aıtady.
Áıeldiń aıtýynsha, onyń 11 jastaǵy qyzy men 7, 5, 4 jastaǵy ul balalary tańerteńgi ýaqytta úıdiń aýlasynda oınap júrgen.
Birshama ýaqyttan keıin qarasa, jaqyn arada balalary kórinbeıdi. Anasy ózi ary-beri izdep, jarty saǵattaı ýaqytyn jumsaıdy.
Іzdeýden nátıje shyqpaǵannan keıin, polıtseılerden járdem suraıdy.
Bir otbasynyń 4 birdeı jas balalary ushty-kúıli joǵalǵanyn estigen polıtseıler olardy aman-esen úıine qaıtarý úshin birden áreket etti.
Oqıǵa ornyna birneshe topqa bólingen tártip saqshylary jedel jetti. Jan-jaqty izdestirý jumysyn júrgizdi.
Kýágerlerden surastyrdy, kóshe-kósheni, úılerdi retimen muqııat qarap shyqty. Odan bólek, qaraýsyz qalǵan úıler de tyńǵylyqty tekserildi.
Birneshe saǵatqa sozylǵan polıtseılerdiń izdestirýi oń nátıje berip, balalar 8 shaqyrym qashyqtyqtaǵy basqa kósheden tabyldy.
Osylaısha oınap júrip adasqan búldirshinderdi ıývenaldy polıtsııa tobynyń ınspektory, polıtsııa maıory Toılybaı Qoshtaev din aman tapty.
Tártip saqshylary balalardyń as-sýyn berip, jaǵdaıy jaqsy ekenine kóz jetkizip, ata-anasyna túsindirý jumysyn júrgizdi. Balaqaılardy úıine qaıtardy.
Óz kezeginde bir sátte balalarynan aıyryla jazdaǵan ana tártip saqshylaryna shynaıy rızashylyǵyn jetkizdi.
«Aıtarǵa sózim joq, polıtseılerge úlken alǵys! Oınap júrip, bir sátte kózden tasa bolǵan balalarymdy eki saǵat boıy izdep, taýyp bergenin erlikke balar edim. Jumysyna tabys tileımin» dep aqjarma tilegin jaýdyrdy.
Túrkistan oblysynyń polıtseıleri azamattarǵa kishkentaı ul-qyzdarǵa abaı bolyp, olardy qaraýsyz qaldyrmaýǵa keńes beredi.
