Túrkistan oblysynda otbasyn qoldaý ortalyqtary qurylady
Jańa mekemeler 2025 jylǵa deıin jumysyn bastaıdy. Bul týraly Túrkistan oblysy ákimdigi janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi komıssııanyń otyrysynda aıtyldy.
Sondaı-aq, óńirde otbasy ınstıtýtyn nyǵaıtý, bilim mekemelerin jańartý, oqýshylarǵa zaman talabyna saı jaǵdaı jasaý, mektepte bala quqyǵy boıynsha keńester berý, qosymsha úırimelerdi kóbeıtý baǵytynda jumystar kúsheıtiledi.
Komıssııasynyń kezekti otyrysyna Bala quqyqtary jónindegi ýákil Dınara Zakıeva, polıtsııa departamentiniń, oblystyq prokýratýra, bilim, densaýlyq saqtaý, áleýmettik qorǵaý, ishki saıasat, mádenıet, din isteri, sport basqarmalary basshylary, Túrkistan oblysyndaǵy bala quqyǵy jónindegi ýákil jáne aýdan, qala ákimderiniń orynbasarlary qatysty. Jıyndy Túrkistan oblysy ákiminiń orynbasary Beısen Tájibaev júrgizip otyrdy.
Komıssııa otyrysynda Túrkistan oblystyq polıtsııa departamenti ókiliniń kámeletke tolmaǵandarǵa qarsy jasalǵan quqyq buzýshylyqtar men qylmystar jáne profılaktıkalyq jumystar týraly deregi baıandaldy.
Birneshe aýdan ákiminiń orynbasarlary bala quqyǵyn qorǵaý baǵytynda atqarylǵan jumystar boıynsha esep berdi. Sonymen birge, óńirdegi keleńsiz oqıǵalar talqylanyp, túrli memlekettik mekemelerdiń jumysyna syn-eskertpe aıtyldy. Mundaı jaǵdaı qaıtalanbaýy úshin jumysty kúsheıtý kerektigi qozǵaldy. Probatsııalyq baqylaý, probatsııalyq baqylaýda júrgen turǵyndardy jumyspen qamtý, balalarǵa qaýipsiz orta qalyptastyrý baǵytynda usynystar berildi. Sýıtsıd, álimjettik, balalar quqyqyn qorǵaý boıynsha mamandar pikiri tyńdaldy.
Dınara Zakıeva saladaǵy kemshilikterge toqtalyp, bul baǵytta barlyq quzyrly organ, memlekettik mekemeler birlese áreket etýi kerektigin jetkizdi.
«Bala quqyǵyn qorǵaý, olardyń baqytty ómir súrýin qamtamasyz etý – bárimizdiń mindetimiz. Ár memlekettik mekeme, basshylar, quqyq qorǵaý organdary men ata-analar óz mindetterine jaýapkershilikpen qaraýlary tıis», - dedi ol.
