Túrkistan oblysynda órtterden 1 mlrd teńgeden astam somaǵa shyǵyn kelgen
TÚRKІSTAN. QazAqparat – Túrkistan oblysynda órtter saldarynan 1 mlrd teńgeden astam materıaldyq shyǵyn keldi, dep habarlaıdyQazAqparat tilshisi.
Jalpy óńirde jyl basynan 289 órt oqıǵasy bolǵan. Saldarynan 6 adam qaza bolyp, 5 adam túrli dene jaraqatymen aýrýhanaǵa jetkizilgen. Jalpy somasy 1 mlrd 063 mln 838 myń teńge bolatyn materıaldyq shyǵyn kelgen.
«Órt shyqqan oryndar boıynsha eń joǵary kórsetkish turǵyn úı sektorynda tirkelip otyr. Oblys aýmaǵynda 184 úıde órt bolǵan, 53 kólik órtengen. Qalǵan órtter óndiristik ǵımarattar men qurylystarda, bilim berý mekemeleriniń ǵımarattary men ákimshilik-qoǵamdyq nysandarda bolǵan. Sondaı-aq aýyl sharýashylyǵy, densaýlyq saqtaý obektileri men saýda oryndarynda, taýar saqtaý qoımalarynda tirkeldi», - dedi Túrkistan oblysynyń Óńirlik kommýnıkatsııalar qyzmetinde ótken brıfıngide Tótenshe jaǵdaılar departamenti bastyǵynyń orynbasary Erik Sarybaev.
Sondaı-aq ol Jetisaı qalasyndaǵy «Kúlparshyn bazary» JShS-ǵa júrgizilgen tekserý barysynda zań buzýdyń 9 faktisi anyqtalǵanyn jetkizdi. Osyǵan oraı Jetisaı aýdany prokýratýrasynyń usynysy boıynsha bazar ıesine eskertý túrinde ákimshilik shara qoldanylǵan.
Aıta keteıik, 26 tamyzda Jetisaıdaǵy «Kúlparshyn» bazarynan órt shyqty. Saldarynan 450-ge jýyq kásipkerdiń zattary tolyǵymen janyp ketti. Keltirilgen shyǵyndy óteý boıynsha arnaıy qor quryldy.
