Túrkistan oblysynda ortaq jaıylym kólemi 1 mln gektarǵa ulǵaıtylady

TÚRKІSTAN. QazAqparat – Túrkistan oblysynda mal sharýashylyǵyn damytýdyń sapalyq kórsetkishteri kóterilip keledi. 1 maýsymdaǵy jaǵdaı boıynsha 181,6 mlrd teńgeniń ónimi óndirilip, ósim 102,8 paıyz boldy. Aýyl sharýashylyǵy janýarlarynyń sany 8 mıllıonnan asyp, byltyrmen salystyrǵanda ortasha eseppen 4 paıyzǵa artty. Bul týraly QazAqparat oblys ákiminiń baspasóz qyzmetine silteme jasap habarlaıdy.

Memleket basshysynyń tapsyrmalary aıasynda mal sharýashylyǵyn sýbsıdııalaý tetigin odan ári jetildirý boıynsha jumystar júrgizildi. Baqylaýshy organdardyń eskertýleri nazarǵa alynyp, sýbsıdııalaý qaǵıdalarynan sybaılas jemqorlyq táýekelderi bar normalar alynyp tastaldy. Sonymen qatar, veterınarııa júıesin reformalaý jumystary júrgizilip jatyr.

Oblysta etti eksporttaý qarqyndy damı bastady. Ótken jyldyń qorytyndysymen 15,7 myń tonna iri qara mal eti, 8 myń tonna qoı eti eksporttaldy. Bıyl bul kórsetkishter iri qara mal eti boıynsha 5 myń tonnaǵa, qoı eti boıynsha 2,6 myń tonnaǵa jetti.

Jalpy, oblysta mal sharýashylyǵy kórsetkishteri oń dınamıkany kórsetkenimen, jaıylym jerlerdiń tapshylyǵy bar. Tapshylyqty joıý úshin ortaq jaıylym kólemin bıyl 1 mln 15 myń gektarǵa ulǵaıtý josparlanǵan. Onyń ishinde, jyl qorytyndysymen 333 myń gektar jer ortaq jaıylymǵa qaıtarylady. Qalǵan 682 myń gektardy qaıtarýǵa eldi mekenderdegi jaıylym júktemesin tómendetý arqylý qol jetkizý josparlanyp otyr. Esepti kezeńde 102 myń gektar jaıylym jer memleket menshigine qaıtaryldy. Jyl qorytyndysymen jospar tolyǵymen oryndalady.

Sonymen qatar, mal sharýashylyǵyn damytý aıasynda jaıylymdyq jerlerge túsetin júktemeni tómendetý maqsatynda basymdyq mal bordaqylaý alańdary men sút-taýarly fermalaryn ashýǵa beriledi. Bul baǵyttarda bıyl birqatar iri ınvestıtsııalyq joba iske asyrylady.

Atap aıtqanda, mal bordaqylaý alańdarynyń sany artady. Bıyl 8 mlrd teńgege 37 myń 350 mal syıatyn 10 ınvestıtsııalyq jobany iske asyrý josparda. Sondaı-aq, 13 mlrd teńgege 2 myń 380 malǵa arnalǵan sút-taýarly fermalary salynyp, 100-den astam jańa jumys oryndaryn ashý kózdelgen.

Qazirgi memlekettik qoldaý sharalary mal sharýashylyǵy salasynyń ınvestıtsııalyq tartymdylyǵyn saqtaýǵa múmkindik berdi. «Aýyl amanaty» baǵdarlamasynyń aıasynda mal bordaqylaý baǵyty boıynsha 695 mln teńgege 157 joba, sút-taýarly fermalary baǵyty boıynsha 788 mln teńgege 170 joba maquldandy. Bul baǵyttaǵy máseleler turaqty baqylaýda.