Túrkistan oblysynda Ordabasy maqta ónimdiligi boıynsha kósh bastap tur
TÚRKІSTAN. QazAqparat - Túrkistan oblysynyń Ordabasy aýdanynda ár gektardan 30 tsentner shıtti maqta jınaldy, dep habarlaıdy QazAqparat óńirlik kommýnıkatsııalar qyzmetine silteme jasap.
Jańa tehnologııalardy qoldanýdyń arqasynda ónimdilik ótken jylmen salystyrǵanda 5 paıyzǵa artqan. Alqaptaǵy maqtany John Deere kombaındarymen terdi. Nátıjesinde, sharýalar joǵary kórsetkishke qol jetkizip otyr. Máselen, «Ramazan-Agro» JShS gektarynan 35 tsentnerden ónim alǵan. Al, «Ordabasy-Agro» gektarynan 41 tsentnerden maqta jınady.
Aıta keterligi, Túrkistan oblysynda bıyl maqta terimi naýqany ónimdi tehnıkamen jınaýǵa basymdyq berilýimen de erekshelenýde. Jalpy, óńirde aq altynnyń 83 paıyzy kombaınmen jınalyp otyr. Al baǵa máselesine toqtalsaq, alǵashqyda maqtanyń tonnasy 130 myń teńgeden qabyldansa, búginde bir tonna maqtanyń baǵasy 155 myń teńgege baǵalanýda.
