Túrkistan oblysynda «Ońtústik ańyzdary» ekspedıtsııasy bastaldy
Marǵulan Seısembaevtyń bastamasymen qurylǵan ekspedıtsııa quramynda elge tanymal qoǵam qaıratkerleri, zııaly qaýym ókilderi, ólketanýshylar, jýrnalıster, óner qaıratkerleri, kásipkerler men sportshylar jáne ózge de sala ókilderi bar. Buǵan deıin Jambyl oblysynyń kıeli oryndaryn aralaǵan saıahatshylar óńirdiń tabıǵaty men shejireli tarıhymen tanysty. Qonaqtar Báıdibek aýdanyndaǵy Aqmeshit úńgirinde bolyp, ondaǵy erekshe kóriniske súısindi.
Belgili sport janashyry, «Qazaqstan barysy» jobasynyń avtory Arman Shoraev ekspedıtsııaǵa osy úńgirdi kórý úshin arnaıy kelgenin aıtyp ótti. Al, tanymal rejısser Aqan Sataev Túrkistan oblysynda fılm túsirýge suranyp turǵan oryndar óte kóp ekenin jetkizdi. Bolashaqta osy baǵytta jumys isteýge qarsy emes ekenin sóz etti.
Ólketanýshy, «Ońtústik ańyzdary» baǵytynyń avtory Erlan Syzdyqtyń aıtýynsha, saıahatshylardyń alǵan áserleri keremet. Olardy ólkeniń tabıǵaty men ańyzdary qatty qyzyqtyrǵan. Eger suranys bolsa, osy baǵyt boıynsha týrıstik baǵyt jalǵasady. Osy arqyly Túrkistan oblysynyń týrızmi damıdy. 4 avtobýs pen 60-tan astam jeńil kólikke mingen saıahatshylar tabıǵat aıasynda tamaqtanyp, naǵyz kóshpendilerge tán ómirdi sezindi dese bolady.
Aqmeshit úńgirine aıaldaǵan soń saıahatshylar Domalaq ana kesenesine zııarat jasady. Sondaı-aq Shaıandaǵy Appaq Ishan meshitine de atbasyn buryp, tarıhymen tanysty. Saıahatshylar Túrkistan oblysynda týrızm salasynyń bolashaǵy zor ekenin jetkizdi. Shejire men ańyzǵa toly óńirge qadam basqan ekspedıtsııa músheleri aldaǵy kúnderi oblystaǵy ózge de kıeli oryndardy aralaıdy.
Aıta keteıik, Elbasynyń «Rýhanı jańǵyrý» maqalasynda da osy salaǵa mán berilgen. Respýblıka boıynsha kıeli jáne týrıstik oryndar sany boıynsha da Túrkistan oblysy aldyńǵy qatarda. Osy oraıda respýblıka kóleminde úsh ekspedıtsııa uıymdastyrylǵan. Aýqymy jáne qatysýshylar sany jaǵynan eń úlkeni - osy «Ońtústik ańyzdary» sanalady.
