Túrkistan oblysynda onlaın oqytý júıesi alynyp tastalatyn boldy
TÚRKІSTAN. QazAqparat – Túrkistan oblysynda shalǵaı aýyldarda ǵalamtor jelisi sapasynyń tıisti deńgeıde bolmaýyna baılanysty onlaın oqytý júıesi alynyp tastaldy. Bul týraly oblystyq adamı áleýetti damytý basqarmasynyń basshysy málimdedi, dep habarlaıdy QazAqparat tilshisi.
Raqymbek Jolaevtyń aıtýynsha, óńirde qashyqtan bilim berý protsesi «Balapan», «Elarna», «Ońtústik» telearnalary, «Qazaq radıosy» jáne «Qazposhta» AQ-nyń kómegi arqyly júzege asyrylady. Búgingi kúni bilim berýdiń jańa jobasyna baılanysty daıyndyq jumystary qyzý júrgizilýde.
«Qazirgi tańda oblystaǵy 909 orta bilim berý uıymdarynda 488 182 oqýshy bilim alýda. Onyń 80% aýyldyq jerlerde oqıdy. Úı jaǵdaıynda ınternet jelisine múmkindigi bar oqýshylar sany 124 myń oqýshyny quraıdy, al, 121 myń oqýshynyń kompıýterlik tehnıkalary joq. Osy rette ustazdar men oqýshylardy tıisti kompıýterlik tehnıkamen qamtamasyz etý úshin mektepterdegi 29 myń kompıýter men noýtbýk óz jaýapkershilikteri negizinde taratylyp berildi. Jalpy 9 myńǵa jýyq oqytýshynyń kompıýterlik tehnıkasy jáne 11 myń oqytýshyda ınternet jelisin paıdalaný múmkindigi joq bolatyn», – dedi Raqymbek Qýatbekuly.
Basqarma basshysynyń sózinshe, oblystaǵy 429 943 oqýshy Bilim jáne ǵylym mınıstrligi daıyndaǵan vıdeo sabaqtarmen bilim alady. Telearna kórýge múmkindigi joq shalǵaı eldi mekenderdegi 320-dan astam oqýshy «Qazaq radıosy» jáne «Qazposhta» AQ kómegin paıdalanady. Ustazdar qosymsha aptasyna bir ret oqýshylarǵa «Whatsapp», «Telegram» messendjerleriniń kómegimen tapsyrmalaryn arqyly berip otyrady. Alaıda, ǵalamtorǵa qosylýǵa múmkindigi bar qalalyq mektepterdegi 57 421 oqýshy qosymsha retinde «Bilimland», «Daryn online», Kúndelik.KZ, oqytýǵa arnalǵan portaldardy paıdalana alady. Bul júıemen bilim alý eshbir oqýshyǵa mindettelmeıdi.
Aıta keteıik, Arys qalasyndaǵy bala sany 5-80 deıingi shaǵyn 9 mektep sabaqtarynburynǵysynsha dástúrli túrde óte bermek. Onda aýdandyq taýarlar men qyzmetterdiń sapasy bóliminiń ruqsaty berilgen. Sanıtarlyq-epıdemıologııalyq talaptarǵa saı oqýshylardyń sabaǵy 30 mınýttan jáne eki aýysymda júrgiziledi. Aradaǵy úzilis kezinde bólmeler jeldetilip, qaýipsizdik sharalary saqtalmaq.
