Túrkistan oblysynda óńirlik keńes bıznes máselelerin sheshýge kiristi
«Mamyr aıynda óńirlik kásipkerlermen ótken alǵashqy kezdesýdiń qorytyndysy boıynsha suraqtar paketi Premer-mınıstr deńgeıinde kóterildi. Nátıjesinde 84 júıelik máseleniń 41-i sheshildi, qalǵandary memlekettik organdarmen, ulttyq kompanııalarmen jáne JAO-men birlesip sheshý satysynda. Bıznespen onlaın-kezdesýlerdi turaqty túrde ótkizip otyratyn bolamyz», - dep atap ótti «Atameken» UKP tóralqa tóraǵasy Tımýr Qulybaev.
Onlaın kezdesýde birneshe aýqymdy másele aıtyldy. Onlaın baılanys arqyly ótkizilgen jıynda aımaqtyń ekonomıkalyq jaǵdaıy týraly óńirlik keńes tóraǵasy Qaınar Abasov baıandady.
Kezdesýde «Qazaq maqta qaýymdastyǵy» ZTB tóraǵasy Polat ıÝsýpov ekinshi deńgeıli bankterdegi qarajatqa qol jetkizý máselesin qozǵady. Onyń aıtýynsha, QR Ulttyq banki zańdy tulǵalar úshin qolma-qol aqshany paıdalanýǵa belgilengen 120 mln teńge mólsherindegi lımıti - shıtti maqtany daıyndaý kezeńinde sharýalarǵa múlde jetkiliksiz ekenin aıtty.
Óńirlik keńestiń múshesi, «Baıkenje» sharýa qojalyǵynyń tóraǵasy Nurlan Baıkenjeev jylyjaılarda qoldanylatyn energııaǵa tarıftiń qymbattyǵyn jetkizdi.
Shyǵyndardy azaıtý úshin jylyjaılardy memlekettik qoldaýdyń shuǵyl qajettiligi, sonymen qatar ónimdilikti arttyrý úshin ınnovatsııalyq tehnologııalardy engizý qajettiligin baıandady.
Sondaı-aq, Ózbekstannan shyqqan taýarlardyń dempıngtik jáne resmı emes aınalymy máselesin «Altyn Adam tigin fabrıkasy» JShS basshysy Baljan Halmuratova kóterdi.
Ol eki eldiń naryqtarynda teń básekelestikti júrgizý úshin ónimdi kedendik rásimdeý kezinde Ózbekstan taýarlaryna ózara kelisim ornatý qajettigin atap ótti. Bul shara otandyq taýar óndirýshilerge aıtarlyqtaı qoldaý kórsetpek.
Sonymen qatar, «Qýanysh» JShS basshysy Inara Namazbaeva qarjylandyrýǵa qoljetimdilik máselesin kóterdi.
Túrkistan qalasynda ekinshi deńgeıli bankterdiń tolyq formatty fılıaldarynyń nemese ókildikteriniń bolmaýyna baılanysty qarjylandyrýǵa qoljetimdilik edáýir qıyn ekendigin baıandady.
