Túrkistan oblysynda ónerkásip óniminiń kólemi 500 mlrd teńgege jýyqtady
TÚRKІSTAN. QazAqparat - Túrkistan oblysynda ótken jyly ónerkásip óniminiń kólemi 500 mlrd teńgege jýyqtady. Onyń 245 mlrd teńgesi óńdeý ónerkásibi óndirisine tıesili. Bul týraly Óńirlik kommýnıkatsııalar qyzmetinde ótken baspasóz jıynynda oblys ákiminiń orynbasary Meıirjan Myrzalıev málim etti, dep habarlaıdy QazAqparat.
Onyń sózinshe, óńdeý ónerkásibiniń kórsetkishteri tamaq ónimderin óndirý, jeńil jáne hımııa ónerkásibi, mashına jasaý, farmatsevtıkalyq ónim óndirý jáne ózge de metall emes mıneraldyq ónimder sııaqty baǵyttar boıynsha ulǵaıǵan.
«Ónerkásiptik óndiris kórsetkishteriniń ósý qarqynyn jaqsartý maqsatynda Kásipkerlikti qoldaý boıynsha jemisti jumys júrgizildi. 2019 jyly ındýstrıaldy-ınnovatsııalyq damýdyń memlekettik baǵdarlamasy aıasynda jalpy somasy 22 mlrd teńgege 13 joba júzege asyrylyp, 800-den astam jumys orny ashyldy. 2020 jylǵa 11 jobany iske asyrý josparlanǵan», – dedi oblys ákiminiń orynbasary.
Sondaı-aq, M.Myrzalıev Úkimet tarapynan memlekettik sektordy satyp alý salasynda jergilikti qamtýdyń úlesin ulǵaıtý mindeti qoıylǵanyn aıtty. Osyǵan baılanysty ótken jyly memlekettik uıymdardyń «qarapaıym zattar ekonomıkasy» salasyndaǵy taýarlardy satyp alýynda jergilikti qamtý úlesiniń nysanaly ındıkatorlary asyra oryndalǵan. Atap aıtqanda, jeńil ónerkásip taýarlary – 60, jıhaz – 62, qurylys materıaldary – 67, tamaq – 85 paıyzǵa oryndalyp, sońǵy baǵyt boıynsha Túrkistan oblysynyń kórsetkishi respýblıkada birinshi orynǵa shyqqan.
