Túrkistan oblysynda óndirilgen ónim kólemi artty
TÚRKІSTAN. QazAqparat - Túrkistan oblysynda ótken jyldyń qorytyndysymen áleýmettik-ekonomıkalyq kórsetkishterdiń ósimi joǵary deńgeıde saqtalýda, dep habarlaıdy QazAqparat tilshisi.
Jalpy, óńirlik ónim kólemi 2018 jyldyń qańtar-qyrkúıeginde 1 trln 103,9 mlrd teńge somasynda qalyptassa, 2017 jyldyń tıisti kezeńimen salystyrǵanda 3,9 paıyzǵa artqan.
Oblystyq ákimdiktiń baspasóz qyzmeti málimetinshe, ındýstrııalandyrý kartasy aıasynda 2018 jyly 18,2 mlrd teńgege 10 joba iske qosyldy. Atap aıtsaq, «Green technology industries» JShS (Ordabasy aýdany) PET qaldyqtaryn óńdeý jáne shpateldi talshyqtar óndirisi. Qazirgi ýaqytta jobanyń alǵashqy kezeńi júzege asyrylǵan.
Sondaı-aq, «Golden Camel Group LTD» JShS (Túrkistan qalasy) ónimdiligi 1,5 myń tonna túıe men bıe sútin óńdeıtin kásiporyn jobasy, ÁKK «Asyltuqymdy sharýashylyq, Ordabasy eshki sút ónimderi» Sút-taýar fermasy bazasynda eshki sútin qaıta óńdeý zaýyty, «Badam ónimderi» JShS (Ordabasy aýdany) kúıdirilgen qysh óndirý zaýyty, «Balmuzdaq» JShS (Tólebı aýdany) Shokoladty glazýr jáne shokoladty konfet óndirisi, «Báıterek BBM» JShS (Shardara aýdany) Balyq óńdeý zaýyty, «TMstroı21» JShS (Keles aýdany) Jip óńdeý zaýyty, «Bırlık-4» JShS (Saıram aýdany) Aýyl sharýashylyǵy ónimderin óńdeıtin tsehy, «Asyl-bastaý.kz» JShS (Qazyǵurt aýdany) Maısyz sút untaǵy men maıyn shyǵaratyn zaýyty, «Mıneralnaıa voda Arys» JShS (Arys qalasy) Mıneraldy bótelkelengen jáne alkogolsiz sýsyndardyń óndirisi.
Ótken jyly oblystaǵy ónerkásip óniminiń kólemi 439,1 mlrd teńgeni qurady. Sonyń ishinde, óńdeý ónerkásibinde 236,9 mlrd teńgege ónim óndirilgen. Tıisinshe 2017 jylmen salystyrǵanda ósim 100,7 paıyzdy qurap otyr. Al, óńdeý ónerkásibinde tamaq ónimderin óndirý - 3,6, jeńil ónerkásip - 6,3, hımııalyq ónimder - 7, farmatsevtıkalyq ónimder - 4, elektr jabdyqtaryn jasaý - 7,3 paıyzǵa ósken.
