Túrkistan oblysynda óndirilgen 9,6 myń tonna et BAÁ, Ózbekstan jáne Iranǵa eksporttalǵan
TÚRKІSTAN. QazAqparat- Túrkistan oblysynda tórt túliktiń sany kún sanap ósip, iri qara mal 994,2 myń basty quraǵan. Bul týraly oblystyq aýyl sharýashylyǵy basqarmasynyń basshysy Nurbek Badyraqov málimdedi, dep habarlaıdy QazAqparat tilshisi.
Basqarma basshysynyń sózinshe, óńirde qoı-eshki sany 4,1 mln basty qurap, respýblıkadaǵy úlesi birinshi orynǵa turaqtaǵan.
Sondaı-aq, jylqy 320,5 myń, túıe 28 myń, qus 2,04 mln basty quraǵan. Nátıjesinde, aımaqta et óndirý 5%-ǵa artyp, 222 myń tonnaǵa jetken. 699 myń tonna sút jáne 188,1 mln dana jumyrtqa óndirilgen. Sharýa qojalyqtary 9,6 myń tonna etti Ózbekstan, Iran, BAÁ elderine eksporttap, bul respýblıkadaǵy eksporttyń 54%-yn qurap otyr.
Aýyl sharýashylyǵy ónimderin qaıta óńdeý salasynda oblysta 38 et óńdeý kásiporynynda 19,6 myń tonna et, 35 sút óńdeý kásiporynynda 59,1 myń tonna sút, 34 jemis-kókónis óńdeıtin kásiporynda 24,6 myń tonna jemis qaıta óńdelgen. Bul kórsetkish 39,7 mlrd teńgeni qurap, 2,2 mlrd teńgege artqan.
