Túrkistan oblysynda on jyl buryn salynǵan mektep apatty dep tanyldy
Jeti qazyna aýylyndaǵy jalǵyz mektepte 250 bala oqıdy. Mektep ákimshiligi eki jyl buryn ǵımarattyń bir bóligin irgetasy otyrǵan soń, qaýipti dep jaýyp tastaǵanyn aıtady. Al, bıyl jaryqtar múlde kóbeıip ketipti. Jyl saıyn qurylys salǵan kompanııa ókilderin jylda shaqyrtamyz deıdi. Al, bıyl shatyrdan aqqan sýdan bólmelerdiń qabyrǵalary kógertip, kafelderi túsip jatyr eken. Jaryqtardyń arasy ashylyp, adam shoshyrlyq jaǵdaıǵa jetken.
«Іrgetasy jarty metrge otyrdy ǵoı. Qorqatyndaı jaǵdaıǵa jetti. Qabyrǵalar jarylyp jatyr, sógilip jatyr. Bir jerin jamasaq, ekinshi jeri ketip jatyr. Ol jerdi jamasaq, basqa jaǵy ketedi. Keıbir bólmelerge barsańyz kóp ashylyp ketken»,- deıdi mekteptiń qyzmetkeri Moldatileý Sanaev.
Bilim uıasynyń qurylys barysyn kózben kórip, basy-qasynda júrgen aýyl aqsaqaly Nurqozy Mámbetov bul mektepke bala oqytý qaýipti degen pikirde. Sebebi irgetasy da, qabyrǵasy da talaptarǵa saı qalanbaǵan deıdi. Aqsaqaldyń sózinshe, mektepti salyp bitkennen keıin bir jyldan keıin-aq qabyrǵalary jaryla bastaǵan. Qazir esikteri jabylmaı, jańbyr jaýsa sý aǵatyn jaǵdaıǵa jetken. Bolmaǵan soń merdiger óz esebinen jóndeý júrgizýde.
«Mekteptiń irgetasy quıylǵanda temirjoldaǵy qıyrshyq tastardy, nuqyl topyraqtardy tókti. Myna jerde fýndament joq astynda. Muny dáý-dáý holl uqsatyp istegen daǵy, ortasynan jarty qyshtan órip shyǵa salǵan. Myna fýndamentti quıyp jatqanda da arasyna armatýrany kem saldy. Salǵan jerine saldy, salmaǵan jerine qaldy. Jeldetkishi joq astynda, bolmaǵannan keıin edenderi shirıdi»,- deıdi Nurqozy Mámbetov.
Mektep basshylyǵy balalardyń ómirinen qaýiptenip, bıyl tehnıkalyq saraptama jasatqan. Ondaǵy mamandar mektepti apatty dep tanyp, súrý kerek degen qortyndy jasapty. Soǵan qaramastan aýdandyq bilim bóliminiń basshylyǵy jańa oqý jylynda balalardy osy mektepte oqytpaq.
«2022 jylǵy shilde aıynda alynǵan tehnıkalyq qortyndyda bul mektepti apatty jaǵdaıda dep tanydy daǵy, jóndeý jumystaryna óte kóp qarjy ketetinin jáne soǵan oraı ony apatty dep taný týraly sheshim qabyldanǵan. Merdiger tarapynan qazir jóndeý jumystary aıaqtalǵan jaǵdaıda mektepte biz oqytatyn bolamyz»,- deıdi Jetisaı aýdandyq adamı áleýetti damytý bóliminiń basshysy Tursyn Myrzalıev.
Bir qyzyǵy apatty mekteptiń qurylysyn júrgizgen kompanııa bıyl Maqtaaral men Jetisaı aýdandarynda taǵy jeti memlekettik nysannyń ǵımaratyn salyp jatyr. Onyń úsheýi bilim uıalary bolyp tabylady. Al, Jeti qazyna aýylyndaǵy ata-analar bolsa bıyl apatty mektepke balalaryn jiberýden úreılenip otyr. Kórshi aýyldarǵa tasymaldap oqytsa da qaýipsiz jerde bilim alsa deıdi.