Túrkistan oblysynda oqýshylardyń 92% qashyqtan bilim alady
TÚRKІSTAN. QazAqparat - Túrkistan oblysynda 1 qyrkúıekten bastap oqýshylardyń 92% qashyqtan oqytý formatynda bilim alady. Bul týraly búgin oblys ákimi Ómirzaq Shókeev Óńirlik kommýnıkatsııalar qyzmetinde ótken brıfıngide málim etti, dep habarlaıdy QazAqparat.
Ó.Shókeevtiń aıtýynsha, bul - óńirdegi epıdemıologııalyq ahýaldyń turaqtylyǵyn saqtaý maqsatynda qolǵa alynyp otyr.
Óńirde epıdemıologııalyq jaǵdaı turaqtanyp, oblystyń Bas sanıtar dárigeri ruqsat berse, balap sany 180-nen aspaıtyn shalǵaıda ornalasqan shaǵyn-jınaqy mektepterge dástúrli túrde oqýǵa ruqsat beriledi. Túrkistan oblysynda mundaı shaǵyn mektepter sany - 139, ondaǵy oqýshy sany - 12 myńnan asady. Osy oraıda jergilikti aýdan, qala ákimderi men bilim basqarmasy birlesip, barlyq tıisti qaýipsizdik sharalaryn qabyldaýy qajet. Eń aldymen mektepte medıtsınalyq qyzmetker kúni boıy oqýshylardy baqylaýy qajet. Sanıtaızerler ornatylyp, ár partaǵa tek bir oqýshydan otyrýy tıis», degen oblys basshysy shalǵaı aýyldarǵa ǵalamtor jelisin tartý, az qamtamasyz etilgen otbasy balalaryna kompıýter berý, oqýshylardy kitappen qamtamasyz etý máselesine toqtaldy.
«Búgingi tańda az qamtamasyz etilgen otbasynan shyqqan oqýshylardyń kompıýterlik tehnıkasy joq. Ol úshin Úkimet tarapynan 57 myńnan astam kompıýter áperý protsesi júrýde. Atalǵan tehnıkalyq jabdyqtar I toqsannyń aıaǵyna deıin jetkiziledi.
Kompıýterlik tehnıka az qamtamasyz etilgen otbasynan shyqqan bilim alýshylarǵa jáne ustazdarǵa qashyqtan oqytý kezinde paıdalaný úshin ýaqytsha beriletin bolady», dep atap ótti. Al oblystaǵy 838 eldimekenniń 707-de ınternet jáne uıaly baılanys júıeleri bar, al 131 eldimekende ınternet jelisi joq. Bul máseleni ońtaıly sheshý boıynsha Qazaqstannyń tsıfrlyq damý, ınnovatsııalar jáne aeroǵarysh ónerkásibi mınıstrligi, uıaly operatorlar «Qazaqtelekom» AQ-men birlese otyryp, 2 jyldyq damytý baǵdarlamasyn daıarlaýda.
Sondaı-aq oqý jylyna daıyndyq barysynda oblystaǵy barlyq bilim mekemelerine qajet oqýlyqtardyń 100% qarjysy tólenip, tasymaldaý jumystary uıymdastyryldy. 25 tamyzǵa deıin barlyq oqýshylarǵa qajetti oqýlyqtar jetkiziletin bolady.
Budan bólek, búgingi tańda 48 mekteptiń qurylysy júrgizilýde.
