Túrkistan oblysynda oqýshylar júrgizýshilerge oı salar hat jazdy
TÚRKІSTAN. QazAqparat - Túrkistan oblysyndaǵy Jetisaı aýdanynda polıtsııa basshylyǵy mektep oqýshylary arasynda «Júrgizýshige hat» shyǵarmashylyq aktsııasyn ótkizdi. Sharada jasóspirimder jyldamdyqty asyryp, jol belgilerine nazar aýdarmaıtyn júrgizýshilerge tilekterin jetkizdi, dep habarlaıdy QazAqparat tilshisi.
Mektep jasyndaǵy balalardyń hattary kólik júrgizýshilerine tikeleı baǵyttaldy. Jasóspirimder óz hattary arqyly qarsy betke shyǵyp nemese mas halde kólik júrgizetin, jol apattaryna sebepshi bolatyn júrgizýshilerge oı salatyn sózder jazdy. Jol apattaryn boldyrmaý men aldyn alý baǵytynda óz usynys-pikirlerin jetkizdi.
«Qymbatty júrgizýshi aǵaı, qoǵamdyq kóliktiń qyzmetin kúndelikti paıdalanamyz: onymen jumysqa baramyz, úıge qaıtamyz. Kólikti abaılap júrgizseńiz, barlyǵymyz aman bolamyz, apattardan saq bolý- óz qoldaryńyzda! Saparyńyz sátti bolǵaı», delingen hattardyń birinde.
Jetisaı APB bastyǵy Ermahan Abdramanovtyń aıtýynsha, jol erejelerin qatań buzýǵa jol bergen júrgizýshilerge osy hattar oı salýy bek múmkin.
«Kólik tizgindegen azamattardy jazalap, aıyppuldar salynyp jatsa da, oǵan sebepshiler sany azaıar emes. Sondyqtan da aq qaǵaz arqyly júrgizýshige talap-tilegin jetkizgen oqýshylardyń pikiri arqyly zań buzýshylyqtardyń aldyn almaqpyz. Aktsııa barysynda oqýshylar jazǵan materıaldar árbir kólik tizgindegen júrgizýshige kórsetiletin bolady. Bul hattar jol apattarynyń oryn almaýyna uıytqy bolady dep senemiz»,- deıdi Ermahan Abdramanov.
Shyǵarma jazǵandardyń arasynan Ońalbek Saltanat úzdik dep tanylyp, óziniń haty arqyly erekshelendi. Jeńimpaz qyz Jetisaı APB basshysynyń atynan «Alǵys hatpen» marapattalyp, baǵaly syılyqtarǵa ıe boldy. 
