Túrkistan oblysynda oqýshylar qashyqtyqtan oqytylady
TÚRKІSTAN. QazAqparat – Qazaqstanda koronavırýsqa baılanysty tótenshe jaǵdaıdyń jarııalanýyna oraı Túrkistan oblysynyń jalpy bilim berý salasynda barlyq saqtyq sharalary qolǵa alynýda. Mektep oqýshylarynyń 5 sáýirge deıingi demalystary aıaqtalǵan soń, oqýshylardy qashyqtyqtan oqytý úshin daıyndyq jumystary júrgizilýde. Bul týraly Óńirlik kommýnıkatsııalar qyzmetinde ótken brıfıngte Adamı áleýetti damytý basqarmasynyń basshysy Rahymbek Jolaev málimdedi.
Aıta keterligi, oqýshylar úshin oqý quraly retinde vıdeo-sabaqtar, derbes onlaın-jumys pen onlaın-kýrstar boıynsha qarqyndy jumys júrgizilýde. 16 naýryzdan bastap, kolledjder men JOO stýdentteri qashyqtyqtan oqytý tehnologııalary negizinde bilim alýǵa kóshýde (ZOOM, bilimland, google Classroom, Platonus, MOODLE).
«Mektepke deıingi bilim berý mekemeleri shtattyq negizde jumys jasaýda. Balabaqshaǵa balany jiberý-jibermeý ata-ana erkine qaldyrylǵan. Balalar úıindegi jaǵdaıǵa baılanysty ınternat ákimshilikterine de arnaıy mindetter júktedik. Balalar úıine kirý-shyǵý qatań baqylanatyn bolady», - dedi Rahymbek Jolaev.
Sonymen qatar, brıfıngte Túrkistan oblystyq Qoǵamdyq densaýlyq basqarmasy basshysynyń mendetin atqarýshy Saltanat Jamalova oblys boıynsha koronavırýs ınfektsııasymen aýyrǵan naýqastar tirkelgen jaǵdaıda olardy jatqyzý úshin statsıonarlarda 100 oryn daıyndalǵanyn jetkizdi.
«Koronavırýs ınfektsııasyna uqsas derti bar naýqastardy jatqyzý, dıagnozdaryn anyqtaý maqsatynda 240 tósek orynǵa provızorlyq statsıonarlar qarastyrylǵan. Barlyǵy - 340 oryn. Odan bólek, barlyq aýdandar men qalalardaǵy ınfektsııalyq aýrýlar bólimderi daıyndyq jaǵdaıyna keltirilgen. Qarym-qatynasta bolǵandardy oqshaýlaý úshin oblys aýmaǵyna 505 orynǵa observatsııalyq gospıtaldar josparlanǵan», - dedi SaltanatJamalova.
Brıfıngke qatysqan Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásııa Temirbaeva basqarmaǵa baǵynyshty mekemelerde karantındik rejım jarııalanǵanyn aıtty.
«13 medıtsınalyq-áleýmettik mekemede, onyń ishinde múgedekter men múgedek balalarǵa arnaýly áleýmettik kómek kórsetetin ortalyqtary jáne oralmandardy beıimdeýge arnalǵan 1 ortalyqta 5068 qyzmet alýshy tirkelgen. Olarǵa qyzmetterdi jalpy 1 321 qyzmetker kórsetýde. Qamqorlyqqa alynǵandar arasynda koronavırýs ınfektsııasynyń jappaı taralý jaǵdaıyn boldyrmaý úshin barlyq medıtsınalyq-áleýmettik mekemelerde karantın rejımi jarııalandy», - dedi ol.
