Túrkistan oblysynda oqýlyqtardy jalǵa bergen kitaphanashy jumystan shyǵaryldy
ShYMKENT. QazAqparat - Túrkistan oblysynyń Tóle bı aýdanynda oqýshylarǵa oqýlyqtardy jalǵa bergen kitaphanashy aqyry jumystan shyǵaryldy. Bul týraly oblystyq Bilim basqarmasynyń baspasóz qyzmeti málimet taratty, dep habarlaıdy QazAqparat tilshisi.
Aıta keteıik, buǵan deıin Shahta Toǵys eldimekenindegi № 8- shaǵyn jınaqty jalpy orta mektebinde oqýlyqtar oqýshylarǵa 400 teńgeden jalǵa berilip jatqandyǵy jóninde aıtylǵan bolatyn. Osyǵan oraı 21 qyrkúıekte quramynda Tóle bı aýdandyq bilim bóliminiń basshylyǵy men aýdandyq máslıhat depýtaty, ákimdiktiń bas ınspektory men bilim bóliminiń ádiskerleri bar arnaıy komıssııa qurylyp, atalǵan mekteptegi kitaphana jumysyna tekserý júrgizgen.
«Bıylǵy oqý jylynda № 8-shi shaǵyn jınaqty jalpy orta mektebindegi 2-synyp oqýshylarynyń 12-sine kitaptar jetpegen. Mektep kitaphanashysy N. Dosalıeva jetpegen oqýlyqtardy B.Bıbolatuly atyndaǵy orta mekteptiń kitaphanashysynan ózara kelisim aktisin túzý arqyly bir oqý jylyna aqysyz qoldanýǵa alǵan. Aýdandyq bilim bólimine kitaptar jetpeıtini týraly hat joldamaǵan. Kitaphanashy men synyp jetekshisi oqýshylardyń ata-analaryna jalǵa aldyq dep aıtqan. Bul týraly mektep basshylyǵyn eskertpegen. Ata-analardyń barlyǵynan aqsha jınap úlgermegen», - delingen komıssııa jumysynyń qortyndysynda.
Oblystyq Bilim basqarmanyń habarlaýynsha óreskel kemshilikterge jol bergeni úshin aýdandyq bilim bóliminiń kitaphana isine jaýapty ádiskerine eskertý, mektep dırektoryna sógis berilgen. Synyp jetekshisine qoldanylyp, kitaphanashy jumystan bosatylǵan.
