Túrkistan oblysynda notarıattyq qujattar elektrondy nusqada rásimdeledi
Oblystyq Ádilet departamentiniń basshysy Muhıt Turǵaraevtyń aıtýynsha, notarıýstarǵa muragerlik istiń ashylǵany jáne ósıetterdiń esepke alynǵany týraly málimetterdi rásimdeýde birqatar mindettemeler júktelip otyr.
«Bul jańashyldyqtyń taǵy bir ereksheligi - azamattar ózderi turyp jatqan eldi mekende otyryp, elektrondy-tsıfrlyq qoltańbanyń kómegimen respýblıkanyń basqa jerindegi jyljymaıtyn múlkin rásimdeý múmkindigine ıe bolady. Jańasha júıege sáıkes, árbir notarıattyq qujatqa avtomatty túrde biregeı QR-kod beriletin bolady», - dedi departament basshysy.
Sondaı-aq, jıyn barysynda departament basshysy jyljymaıtyn múlikke quqyqtardy tirkeý salasyna engizilgen ózgerister de toqtaldy.
«Aldaǵy ýaqytta jergilikti jerlerdegi sáýlet jáne qala qurylysy organdary jyljymaıtyn múlik obektisiniń buzylǵanyn rastaıtyn qujat berýge jaýapty bolady. Buǵan deıin azamattar óziniń turǵyn úı jaǵdaıyn jaqsartý úshin eski úıiniń ornyna jańasyn salyp, obektini buzý týraly qujatqa qol jetkize almaı jatatyn. Nátıjesinde qaıta salynǵan úıdiń qujatyn zańdastyrý qıyndyq týdyryp keldi. Endigi jerde jyljymaıtyn múlik derekqoryndaǵy obektiler týraly málimetter ýaqtyly jańaryp, tulǵalardyń salyqty der kezinde, naqty nysan úshin tólep turýyna jol ashylady», – dedi M.Turǵaraev.
Aıta keteıik, ótken jyly Ádilet departamenti memlekettik qyzmettiń 13 túri boıynsha 1 130 qyzmet kórsetken. Sondaı-aq, jeke jáne zańdy tulǵalardan 2169 ótinish pen aryz-shaǵym túsken.