Túrkistan oblysynda nóser jańbyr saldarynan ózender arnasynan asýda
TÚRKІSTAN. QazAqparat - Túrkistan oblysynda nóser jańbyr saldarynan ózender arnasynan asýda. Osy jaǵdaıǵa baılanysty jergilikti deńgeıdegi tótenshe jaǵdaı jarııalanyp, arnaıy shtab quryldy,dep habarlaıdy QazAqparat óńir basshysynyń baspasóz qyzmetine silteme jasap.
Oblys basshysy Ómirzaq Shókeev Tólebı aýdanyndaǵy selden zardap shekken aýmaqtardy aralady. Munda tolassyz jaýǵan nóser jaýynnyń áserinen Tólebı aýdanyndaǵy ózenderdiń sý deńgeıi kóterildi. Sońǵy aqparat boıynsha, aryq-atyz, qyr-saılardan jınalyp aqqan jańbyr sýynan 6 eldi mekendegi 260 turǵyn úılerdiń aýlasyna sý kirdi. Barlyǵy qaýipsiz aýmaqqa kóshirilgen. 27 úıdiń qulaý qaýpi bar.
«Tek 40 mınýttyń ishinde 1 aılyq mólsherdegi jańbyr jaýǵan. Bul sońǵy jyldary alǵash ret oryn alǵan tabıǵı qubylys. Qaýipsiz aýmaqqa kóshirilgenderińiz durys boldy. Úılerdi polıtsııa qyzmetkerleri kúzetedi. Ýaıymdamańyzdar. Barlyq aýdandar osynda kómekke kelip jatyr»,- dedi Ómirzaq Estaıuly Tólebı aýdany turǵyndarymen kezdesý kezinde.
Túnde munda Qazyǵurt, Saıram jáne Ordabasy aýdandarynan kómek jetti. Olar halyqty evakýatsııalap, qajetti zattar men ystyq tamaqpen qamtamasyz etýde.
