Túrkistan oblysynda negizgi kapıtalǵa salynǵan ınvestıtsııa kólemi 288 mlrd teńgeden asty
TÚRKІSTAN. QazAqparat - Túrkistan oblysy boıynsha ótken jyly negizgi kapıtalǵa salynǵan ınvestıtsııa kólemi 288 mlrd 76 mln teńgege jetken.
Investıtsııa salymdarynyń basym bóligi ónerkásip, aýyl, orman jáne balyq sharýashylyǵy jáne jyljymaıtyn múlikpen jasalatyn operatsııalar salalaryna tıesili, dep habarlaıdy QazAqparat tilshisi.
Oblystyq ákimdiktiń baspasóz qyzmeti habarlaǵandaı, negizgi ınvestıtsııalyq salymdardyń 80,7 paıyzyn shaǵyn kásiporyndar júzege asyrǵan. Olardyń kólemi 232 mlrd 376 mln teńgege jetken. Budan ózge, 2019 jylǵy 1 qańtaryndaǵy jaǵdaı boıynsha Túrkistan oblysynda 14 059 zańdy tulǵa tirkelgen. Respýblıka boıynsha tirkelgen zańdy tulǵalardyń jalpy sanyndaǵy oblystyń úlesi 3,2 paıyzǵa jetip otyr. Oblysta zańdy tulǵalardyń jıi tirkeletin qyzmet túri - aýyl, orman jáne balyq sharýashylyǵynda bolýda. Sonymen qatar, oblystaǵy bólshek saýdanyń kólemi ótken jyly 148 286 mln teńgege jetip, 2017 jyldyń tıisti kezeńimen salystyrǵanda 4,1 paıyzǵa óskeni baıqalady. Bólshek saýda aınalymynyń jalpy kóleminde azyq-túlik taýarlarynyń úlesi - 27, azyq-túlik emes taýarlary - 73 paıyzdy quraǵan. Kóterme saýdanyń kólemi 69 mlrd 784 mln teńgege jetken. Kóterme saýda taýar aınalymynyń qurylymynda 53,4 paıyzyn azyq-túlik emes taýarlar jáne óndiristik-tehnıkalyq mándegi ónimder alady. Sondaı-aq, 2018 jyly Óńirdiń Eýrazııalyq ekonomıkalyq odaq elderimen ózara saýda aınalymynyń kólemi - 235 mln AQSh dollardy qurady. Onyń ishinde eksport - 179 mln AQSh dollary, ımport - 56 mln AQSh dollar bolǵan.
Aımaqtaǵy jumys istep turǵan shaǵyn jáne orta kásipkerlik (ShOK) sýbektileriniń sany jyl basyndaǵy esep boıynsha 130 804 birlikti qurady. Elimizdegi jumys isteıtin kásipkerlik nysandarynyń 10,5 paıyzy Túrkistan oblysyna tıesili.
