Túrkistan oblysynda múmkindigi shekteýli jandar saılaýǵa belsendi qatysýda

TÚRKІSTAN. QazAqparat – Túrkistan oblysynda múgedektigi bar jandar belsendi daýys berip jatyr, dep habarlaıdy QazAqparat tilshisi.

Saıram aýdanyna qarasty Mankent aýyldyq okrýgindegi №604 saılaý ýchaskesine kelgen І toptaǵy múmkindigi shekteýli azamat Danııar Mamadıev alǵashqylardan biri bolyp óz tańdaýyn jasady. Saılaý ýchaskesiniń tóraǵasy saılaýǵa kelip óz azamattyq belsendiligin tanytqan azamatqa rızashylyǵyn jetkizip, syılyq tabys etti. Al, Jetisaı aýdany boıynsha 75 saılaý ýchaskesine erekshe jaǵdaılardy qajet etetin múgedektigi bar 1151 saılaýshy tirkelgen.

Olardyń 83-i kreslo-arbalardy paıdalansa, 486 tulǵa kórý qabiletinen tolyq aıyrylǵan azamattar. Al, 582 saılaýshyniń estý, sóıleý qabileti joq. Búginde barlyq saılaý ýchaskelerinde múgedektigi bar adamdarǵa qolaıly jaǵdaı jasalǵan. Pandýstar, toktıldi jolaqtar, silteýishter, arnaıy buryshtarmen qamtamasyz etilgen. Odan bólek, úıinde daýys beretin saılaýshylarǵa saılaý ýchaskeleriniń komıssııa músheleri zańdylyqtar men ereje-talaptardy saqtaı otyryp, óz tańdaýlaryn jasaýǵa múmkindikter jasaýda. Al, múgedektigi bar ózdiginen júrip-tura alatyn jandarǵa ınvataksı men áleýmettik taksı qyzmeti, estıtin jáne estimeıtin adamdar arasynda deldaldyq qyzmet kórsetýge baılanysty arnaıy maman bekitilgen.