Túrkistan oblysynda monshadan shyqqan sarqyndy sý tabıǵatty lastap jatyr

TÚRKІSTAN. QazAqparat - Túrkistan oblysynda sarqyndysy ashyq jerge aǵyp, kir-qoń sýy tabıǵatty lastap jatqan monshalar jappaı tekseriledi. Bul týraly aımaq ákimi Darhan Satybaldynyń tóraǵalyǵymen ótken aptalyq jıynda aıtyldy, dep habarlaıdy QazAqparat tilshisi.

Túrkistan oblysynda jer astynan shyǵatyn ystyq sýdyń ústine kásipkerler 69 monsha salǵan. Olardyń eń kóbi Otyrar men Keles, Saryaǵash jáne Ordabasy aýdandarynda ornalasqan. Onyń ishinde 16 monsha káriz júıelerine qosylsa, 23 monshanyń sarqyndy sýy talapqa sáıkes emes septıkke tógilýde. Keı monshalar Ekologııa departamentiniń ruqsatynsyz jumys istep jatyr. Al, qalǵan 30 monshadan shyqqan sarqyndy sý tikeleı jer bederine ashyq kúıde tógilýde. ıAǵnı, termaldy sýdan paıda taýyp jatqandar las sýdy súzgiden ótkizetin qondyrǵy ornatpaǵan. Shaıyndy káriz júıesine emes, dalaǵa aǵyp jatyr. Jaıylymǵa jetken sabyndy sý malǵa, qorshaǵan ortaǵa jáne egistik alqaptarǵa zııan keltirýde. Bıznes ókilderine ekologtar eskertý jasap, súzgi ornatýdy júktegen. Alaıda nátıje joq.

Jıynda Darhan Satybaldy jyl sońyna deıin barlyq monshalardy zań talaptaryna sáıkestendirý boıynsha jumystar júrgizýdi júktedi jáne monshadan shyqqan sarqyndy sýlardyń kólemine qaraı modýldi tazartqysh qondyrǵylary ornatylýy tıis ekendigin aıtty.

«Bul problema jyldar boıy sheshimin tappaı kele jatyr. Eshqashan qolǵa alynbaǵan. Tekserýlerden esh nátıje joq. Atalǵan kemshilikterdi monsha ıeleri óz qarajaty esebinen joıyp, sanıtarlyq normalaryna keltirý qajet. Osy boıynsha túsindirý jumystaryn júrgizýdi tapsyramyn. Káriz júıelerine qosylmaǵan monshalarǵa Ekologııa departamentimen birlesip, zań aıasynda tıisti sharalar qabyldansyn. Jyl sońyna deıin barlyq monshalardy zań talaptaryna sáıkestendirý boıynsha jumystar júrgizilsin,-dedi oblys ákimi Darhan Satybaldy.