Túrkistan oblysynda mıkrokredıt uıymdary men lombardtar qaıta tirkeýden ótip jatyr
Memleket basshysynyń Jarlyǵymen 2020 jyldyń 1 qańtarynan bastap jańa memlekettik organ – QR Qarjy naryǵyn retteý jáne damytý agenttigi jumysyn bastady.
Agenttik qarjylyq qyzmetterdi tutynýshylardyń quqyǵyn jáne zańdy múddelerin qorǵaıdy. Agenttiktiń Túrkistan oblysyndaǵy ókildigi 1 shildege deıin qarjylyq uıymdardyń resmı tirkelýin qadaǵalap, keıin tekserý júrgizedi. Nátıjesine qaraı shara qoldanylady.
Bul týraly brıfıngte agenttiktiń Túrkistan óńirlik ókilder basqarmasynyń bastyǵy Nurjan Ormanov málimdedi.
Onyń aıtýynsha, mıkrokredıttik uıymdar, lombardtar resmı qaıta tirkeýden ótip, zań talaptaryna saı jumysyn bastaıdy.
«Agenttik jáne ókildikteri ár óńirdegi qarjy júıesiniń turaqtylyǵyn qamtamasyz etip, qarjy naryǵyn damytýdy úılestiredi. Máselen, Túrkistan oblysynda 25 mıkrokredıttik uıym resmı jumys istese, búgingi tańda onyń 22-si ótinish berip, 17-siniń qujattary tirkelgen. Qalǵany qaralýda. Sondaı-aq, óńirde 141 lombard jumys isteıdi, onyń 41-i ótinish berip, 35-iniń qujattary rásimdeldi. Tirkeý jumystary bıylǵy 1 shildege deıin jalǵasady», - dedi Nurjan Qonysuly.
Basqarma bastyǵynyń málimdeýinshe, agenttik shaǵyn jáne orta kásipkerlik sýbektilerin qoldaý sharalaryn da qadaǵalaıdy.
Sonymen qatar, Qazaqstan Ulttyq bankiniń enshiles uıymdary arqyly júzege asyrylatyn jeke tulǵalardyń ıpotekalyq turǵyn úı qaryzdaryn jáne ıpotekalyq qaryzdardy qaıta qarjylandyrý baǵdarlamalaryn iske asyrý, sondaı-aq osy baǵdarlamalar sheńberinde bankter qabyldaǵan mindettemelerdiń oryndalýyn baqylaıdy.
«Agenttik boryshkerlerdiń quqyǵyn jáne múddesin kollektorlyq agenttikter tarapynan zańsyz áreketterinen qorǵaýǵa, kollektorlyq qyzmettiń ashyqtyǵyn arttyrýǵa, bereshekti óndirip alý tıimdiligin jáne qaýipsizdigin arttyrýǵa baǵyttalǵan is-sharalardy iske asyrady. Budan basqa, agenttiktiń quzyretine halyqtyń qarjylyq saýatyn arttyrýǵa baǵyttalǵan is-sharalar kiredi» - dedi.