Túrkistan oblysynda mejelengen jospardy oryndaı almaǵan ákimder synǵa ilikti

TÚRKІSTAN. QazAqparat – Túrkistan oblysynda 13 ındıkator boıynsha aýdan, qalalarǵa reıtıngtik baǵalaý júrgizilip jatyr. Atap aıtqanda, jumys oryndaryn qurý, ataýly áleýmettik kómek alýshylar sany, azamattar ótinishterin ýaqtyly qaraý men shaǵyn jáne orta kásipkerliktiń ónim shyǵarylymy sııaqty kórsetkishter saralanady, dep habarlaıdy QazAqparat tilshisi.

Búgin Túrkistan oblysynyń ákimi Darhan Satybaldynyń tóraǵalyǵymen ótken aptalyq apparat otyrysynda ІІ toqsannyń damý qorytyndysy baıandaldy. Jalpy, reıtıngtik baǵalaý nátıjesinde kóshbasshylar bolyp Otyrar, Sozaq aýdandary jáne Arys qalasy ornalasty. Aýtsaıderler – Jetisaı, Saýran aýdandary men Kentaý qalasy.

«Jalpy, bizde ósim bolǵanymen, aýdandar arasynda kórsetkishter túsip ketken. Ásirese, qarajat kóp baǵyttalatyn ońtústik aýdandarda, Maqtaaral men Jetisaıda kórsetkishter nashar. Jumys isteý kerek. Maǵan syltaý aıtýdyń qajeti joq. Bul kórsetkishter – ákim jumysynyń kórsetkishi. Sondyqtan, jospardyń oryndalmaýy – ár basshy úshin syn», - dedi Túrkistan oblysynyń ákimi Darhan Satybaldy.

Atap aıtqanda, ónerkásip óniminiń kólemi boıynsha bekitilgen mejege Túlkibas, Kentaý qalasy qol jetkizbedi. Óńdeý ónerkásibiniń jospary Báıdibek, Keles, Túlkibas aýdandary jáne Kentaý qalasynda oryndalmady. Negizgi kapıtalǵa baǵyttalǵan ınvestıtsııa mejesi boıynsha ındıkator Qazyǵurt, Báıdibek aýdandary jáne Kentaý qalasynda júzege aspady. Aýyl sharýashylyǵynyń jalpy ónimi kólemi boıynsha josparǵa Saryaǵash, Ordabasy aýdandary qol jetkize almady. Qurylys jumystary kólemi jaǵynan Maqtaaral, Saýran aýdandary men Túrkistan qalasynda josparly mejege jetpeı qaldy.

Jańa jumys oryndaryn ashý boıynsha Saıram, Sozaq, Shardara, Jetisaı, Maqtaaral, Ordabasy jáne Kentaý qalasynda josparǵa qol jetkizilgenimen, mindetti zeınetaqy tólemderimen tolyq qamtylmaǵan, sáıkesinshe mejelik jospar oryndalmaǵan. Ózindik kirister jospary barlyq aýdan, qalalarda oryndaldy. Shaǵyn jáne orta kásipkerlik óniminiń shyǵarylymy Ordabasy, Túlkibas, Qazyǵurt, Maqtaaral, Saıram, Báıdibek, Shardara, Jetisaı aýdandarynda jospardaǵydaı atqarylmady.