Túrkistan oblysynda memlekettik turǵyn úıdi bólýde jemqorlyqqa jol berilgen
Mundaı áreketter Kentaý qalasy ákimdiginiń Turǵyn-úı kommýnaldyq sharýashylyǵy jáne turǵyn úı ınspektsııasy, sondaı-aq qurylys jáne sáýlet bólimderiniń qyzmetine sybaılas jemqorlyq táýekelderine syrtqy taldaý júrgizý kezinde tirkelgen, dep habarlaıdy QazAqparat tilshisi.
Osy máseleni talqylaýǵa arnalǵan jıynǵa QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Ǵ.Asanuly men Kentaý qalasynyń ákimi D.Maqajanov, derbes bólim basshylary men turǵyn-úı kommýnaldyq sharýashylyq jáne turǵyn-úı ınspektsııasy men sáýlet jáne qurylys bólimderiniń qyzmetkerleri, arnaıy monıtorıngtik top músheleri men aýyl ákimderi, sondaı-aq BAQ ókilderi qatysty.
Mamandardyń júrgizgen taldaýy baspanaǵa muqtaj adamdardy esepke alýdyń bólek jáne baspana alǵan adamdardyń tizimderiniń, sondaı-aq sońǵy jıyrma tórt aı ishinde turǵyn úı alǵan adamdardyń tizimi merzimdi baspasóz basylymdarynda jáne jergilikti atqarýshy organnyń ınternet-resýrstarynda múldem ornalastyrylmaǵandyǵyn kórsetti.
Sonymen qatar, qoldanystaǵy Zań talaptaryna sáıkes muqtajdar esebinde turatyn azamattarǵa turǵynjaı barlyq qajetti qujattarmen birge ótinish berilgen kezden bastap, tizimderde belgilengen kezektilik tərtibi tolyǵymen oryndalmaǵandyǵynyn kórsetedi. Taldaý barysynda kezekke turmaǵan azamattarǵa páter berý derekteri anyqtaldy.
Atalǵan jaǵdaılar qoldanystaǵy Zań talaptarynyń buzylǵandyǵyn jáne turǵynjaılardy bólý kezinde sybaılas jemqorlyq táýekelderiniń týyndaǵanyn kórsetedi. Anyqtalǵan kemshilikterdi joıý maqsatynda taldaý qorytyndysy Kentaý qalasy ákiminiń jáne bólim basshylarynyń qatysýymen talqylanyp, engizilgen usynystardyń oryndalýyn qatań baqylaý qajettigi eskertildi.
Jıyn sońynda óńirde oryn alǵan sybaılas jemqorlyq derekteri boıynsha arnaıy ázirlengen beınerolık jıynǵa qatysýshylardyń nazaryna usynyldy.