Túrkistan oblysynda memlekettik satyp alý barysynda zań buzǵan sheneýnikter jazalandy
Úsh aýdannyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimderiniń basshylaryna ákimshilik is qozǵalyp, jaýapqa tartyldy, dep habarlaıdy QazAqparat tilshisi.
Túrkistan oblysy boıynsha Básekelestikti qorǵaý jáne damytý departamentiniń málimetinshe, aýdan, qalalarda memlekettik satyp alý salasyna monıtorıng júrgizilgen. Onyń qortyndysymen Báıdibek, Otyrar jáne Túlkibas aýdandarynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimderi memlekettik satyp alýdy bir kózden alý tásilimen ótkizgeni anyqtalǵan. Atap aıtqanda, aýyz sý qubyrlaryn tartý men jylý júıelerin júrgizý kezinde belgili bir kásipkerlik nysandarǵa basymdyq berilgen.
«Atalǵan bólimder memlekettik satyp alýdy júzege asyrý boıynsha kelisimsharttaryn túzip, básekelestikke qarsy áreketterge jol bergen. Sondyqtan zańbuzýshylyq áreketterdiń oryn alýyna baılanysty memlekettik satyp alý konkýrstarynyń nátıjesi ishinara jaramsyz dep tanylady. Tergep-tekserý qortyndysymen joǵaryda atalǵan bólimderdiń basshylaryna qatysty ákimshilik is qozǵalyp, jalpy somasy 1,5 mln teńge kóleminde aıyppul salyndy», - dedi Túrkistan oblysy boıynsha Básekelestikti qorǵaý jáne damytý departamenti basshysynyń orynbasary Danabek Mahatov.
Qazirgi tańda, atalǵan bólimderdiń laýazymdy tulǵalaryna qatysty ákimshilik aıyppuldar tolyq kólemde óndirilgen.
