Túrkistan oblysynda memlekettik qyzmetkerler jetispeıdi

TÚRKІSTAN. QazAqparat - Túrkistan oblysynda halyq tyǵyz ornalasqan, al olarǵa qyzmet kórsetetin memlekettik qyzmetshiler jetispeıdi. Másele búgin Memlekettik qyzmet isteri agenttiginiń tóraǵasy Darhan Jazyqbaevtyń óńirge sapary barysynda talqylandy, dep habarlaıdy QazAqparat tilshisi.

Saryaǵash aýdanynda árbir memlekettik qyzmetkerge myńǵa jýyq turǵynnan keledi. Al, Arys qalasynda 44 myń adamǵa 7 memlekettik qyzmetker ǵana bólingen, onyń tórteýi bir jyldan asa ýaqyttan beri ýaqytsha qyzmetinen shettetilgen. Jetisaı aýdanynda 45 myńǵa tarta oqýshy men júzden asa mektep bolsa, bilim bóliminde nebári 3 memlekettik qyzmetker jumys isteıdi.

Darhan Jazyqbaev bul problemalar qazir agenttik tarapynan qaralyp jatqanyn jetkizdi. Ol sondaı-aq, qazirgi júrgizilip jatqan reformalardy ońtaıly júzege asyrý barysyn baıandap, kórsetiletin memlekettik qyzmetterdiń tıimdi ári sapaly júzege asyrý qajettiligin alǵa tartty. Memlekettik qyzmetke irikteýdi jeńildetý boıynsha jasalyp jatqan birqatar usynystarǵa toqtaldy.

Sondaı-aq, Túrkistan, Kentaý qalalarynda jáne Ordabasy aýdanynda jeke qabyldaýlar ótkizip, azamattardyń aryz-shaǵymdary men talap-tilekterin tyńdady. Qoja-Ahmet ıAssaýı atyndaǵy Halyqaralyq qazaq-túrik ýnıversıtetiniń oqytýshy, professorlar quramymen jáne jas memlekettik qyzmetshiler mektebiniń stýdentterimen kezdesti. Jastarǵa memlekettik qyzmetke ornalasýdyń joldaryn túsindirip, bolashaqta olardyń áleýmettik jaǵdaıy jaqsaryp, jalaqylary ósýi múmkin ekenin jetkizdi. Aıta keteıik, Túrkistan oblysyndaǵy qazirgi memlekettik qyzmetshilerdiń 500-den astamy - osy oqý orynnyń túlekteri.

Eske salsaq, Darhan Jazyqbaev Qoǵamdyq keńestiń jańartylǵan quramynyń alǵashqy resmı kezdesýinde memlekettik qyzmetke kadrlardy irikteý kezinde úmitkerdiń ártúrli qyrlaryn qamtıtyn baǵalaý júıesi kerektigin málim etken.