Túrkistan oblysynda memlekettik qyzmet kórsetý salasynda zańbuzýshylyqtar azaıdy
Nátıjesinde 1 157 buzýshylyq anyqtaldy. Zańbuzýshylyqtar 2019 jylmen salystyrǵanda 32 paıyzǵa tómendegen. Bul týraly Óńirlik kommýnıkatsııalar qyzmetinde ótken brıfıngte departament basshysy, Ádep jónindegi keńes tóraǵasy Aıbek Shilmanov málimdedi.
Onyń aıtýynsha, zań buzýshylyqtardyń basym bóligi jer qatynastary – 632 (54,6%), halyqty áleýmettik qorǵaý – 377 (32,5%), aýyl sharýashylyǵy – 70 (6%), sáýlet jáne qurylys – 52 (4,4%) salalarynda bolǵan.
«Departament tarapynan ákimshilik quqyq buzýshylyqqa jol bergen birqatar laýazymdy tulǵaǵa qatysty 47 ákimshilik hattama túzilip, 1 807 525 teńge aıyppul memleket kirisine óndirilgen. Óz kezeginde, quqyq buzýshylyqtardyń ishinde kóp kezdesetin jaǵdaılar: ruqsat berý merzimin buzý, ruqsat berýden negizsiz bas tartý, ákimshilik jaza qoldanǵannan keıin bir jyl ishinde qaıtalap jasalǵan áreketter», - dedi departament basshysy.
Túrkistan oblysynda 610 memlekettik organ jumys isteıdi. Olarda qazirgi tańda 6 624 memlekettik qyzmetshi jumys atqarýda. Bos laýazymdar sany – 388 birlik. Aıta keterligi, jalpy Túrkistan oblysynda qyzmet berýshi mekemeler tarapynan 2020 jyly kórsetilgen 18 027 462 qyzmettiń 91,1%-y elektrondy.
«Ótinishterdiń negizinde departament ókilderi 24 jospardan tys tekserý júrgizip, aryzdardyń 66,6%-y qanaǵattandyrylyp, 8 tulǵa tártiptik jaýapqa tartyldy. Oblysta memlekettik qyzmetshilerdiń tártiptik jaýapqa tartylý deıgeıi ótken jylmen salystyrǵanda 11%-ǵa azaıǵan. Sonymen qatar, 2020 jyly ótken jylmen salystyrǵanda Ádep normalaryn buzý deregi boıynsha tártiptik ister 43%-ǵa kemigen», - dedi Aıbek Aqbergenuly.
