Túrkistan oblysynda memqyzmet salasyna engizilgen ózgerister túsindirildi

TÚRKІSTAN.QazAqparat - Túrkistan oblysynda memlekettik qyzmet salasy boıynsha engizilgen ózgerister túsindirildi. Bul týraly QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha departamentiniń basshysy, Ádep jónindegi keńes tóraǵasy Ǵalym Tursynbaev arnaıy uıymdastyrylǵan brıfıng barysynda aıtyp ótti, dep habarlaıdy QazAqparat tilshisi.

Ǵalym Tursynbaevtyń sózinshe, «B» korpýsy laýazymyna úmitker tulǵalar úshin jeke qasıetterin baǵalaýǵa arnalǵan testileýde jaýaptardyń rastyq deńgeıi 50 paıyzdan kem bolmaýy tıis. Eger kórsetkish nátıjesi tómen bolsa úmitker jeke qasıetterin baǵalaýdyń rastyq deńgeıinen ótpedi dep tanylady jáne bir aıdan kem emes merzimnen keıin qaıta ótýge múmkindik alady.

"1 aqpannan bastap departament qyzmetshileri óńirlerdegi testileý ortalyǵynda testileý ákimshisi retindegi qyzmetin toqtatty. Bul qyzmetti «Memlekettik qyzmettiń personalyn basqarý ulttyq ortalyǵy» AQ testileý operatory atqaratyn bolady jáne osy ýaqyttan bastap «B» korpýsynyń bos laýazymyna úmitkerler konkýrs jarııalaǵan memlekettik organǵa zańnamany bilý týraly sertıfıkat pen jeke qasıetterin baǵalaý qorytyndysyn ótkizbeıdi", - dedi ol.

Sondaı-aq, kommýnıkatsııalar qyzmetinde belgili bolǵandaı, «B» korpýsy laýazymdarynyń úlgilik biliktilik talaptaryna eń tómengi laýazymdarymen qatar joǵary laýazymdar úshin de eńbek ótili qajet etilmeıdi. Atap aıtqanda, memlekettik organdardaǵy bas maman laýazymyna joǵary bilim bolsa jetkilikti, al jetekshi maman laýazymyna joǵary nemese orta bilimnen keıingi bilimi bar tulǵalar úshin ornalasý quqyǵy berilgen. Osynaý ózgeristerdiń nátıjesinde laýazymdyq sanattar boıynsha qoıylatyn talaptar birshama jeńildetilgenin habarlaǵan departament basshysy bul jumystardyń nátıjesinde merıtokratııa qaǵıdattaryn nyǵaıtý múmkindikteri artqanyn aıtty.