Túrkistan oblysynda mektepti jylytpaq bolyp, ýlanǵan jumysshy esin jıdy
TÚRKІSTAN. QazAqparat - Túrkistan oblysynda mektepti suıyq otynmen jylytpaq bolyp, ýlanyp qalǵan jumysshy esin jıdy. Bul týraly oblystyq densaýlyq saqtaý basqarmasynyń baspasóz hatshysy Mıra Súleımenova QazAqparat tilshisine habarlady.
Mıra Súleımenovanyń sózinshe, Shardara aýdanyndyq aýrýhanasyna aýyr halde jetkizilgen jumysshy ózine kelip, sóıleı bastaǵan.
«1993 jyly týǵan naýqas munaı ónimderinen toksıkologııalyq ýlanýdyń aýyr túrimen jáne bas mıynyń toksıkologııalyq isinýi dıagnozymen kelip túsken bolatyn. Aspıratsııalyq aýrý belgisimen jatqyzylǵan turǵynnyń jaǵdaıy óte aýyr edi. Sondyqtan ol jasandy tynys alý apparatyna qosylǵan. Qazirgi tańda naýqas esin jıyp, jaǵdaıy jaqsaryp keledi. Dárigerlerdiń der kezinde em kórsetýiniń nátıjesinde ol sóıleı bastady»,-deıdi oblystyq densaýlyq saqtaý basqarmasynyń baspasóz hatshysy.
Aıta keteıik, ótken aptada Túrkistan oblysynda mektepti suıyq otynmen jylytpaq bolǵan eki jumysshy ýlanyp qalǵan bolatyn. Olardyń biri aýyr halde aýrýhanaǵa jetkizilse, ekinshisi oqıǵa ornynda qaıtys bolǵan. Shardara aýdandyq aýrýhanasynyń dárigerleri janar-jaǵarmaı beketiniń jumysshysynyń jaǵdaıyn aýyr dep baǵalaǵan bolatyn.
