Túrkistan oblysynda mektepti jylytpaq bolǵan eki jumysshy ýlanyp qaldy
TÚRKІSTAN. QazAqparat - Túrkistan oblysynda mektepti suıyq otynmen jylytpaq bolǵan eki jumysshy ýlanyp qaldy. Jumysshylardyń biri aýyr halde aýrýhanaǵa jetkizilse, ekinshisi oqıǵa ornynda qaıtys bolǵan, dep habarlaıdy QazAqparat tilshisi.
Oblystyq TJD málimetinshe, qaıǵyly jaǵdaı 8 qańtar kúni kúndizgi saǵat tórtter shamasynda oryn alǵan. Shardara aýdanyndaǵy janarmaı beketiniń eki jumysshysy mektep-lıtseıdiń jylý júıesine qajetti suıyq otyndy quıýǵa kelgen. Sol kezde ekeýi de otynnyń ıisinen ýlanyp qalǵan. Qazir aýdandyq aýrýhananyń dárigerleri aman qalǵan jigittiń jaǵdaıyn aýyr dep baǵalap otyr.
«1993 jyly týǵan naýqas munaı ónimderinen toksıkologııalyq ýlanýdyń aýyr túri jáne bas mıynyń toksıkologııalyq isinýi dıagnozymen kelip tústi. Aspıratsııalyq aýrý belgisi men 2-dárejeli ekzotoksıkalyq esin bilmeý baıqalyp otyr. Jaǵdaıy óte aýyr. Jasandy tynys alý apparatyna qosylǵan. Qazirgi tańda toksıkologııalyq dárigerlerden keńes alynyp, qajetti emdik sharalar kórsetilip jatyr» delingen oblystyq densaýlyq saqtaý basqarmasy baspasóz qyzmetiniń habarlamasynda.
