Túrkistan oblysynda mektep tapshylyǵyn joıýda jekemenshik bilim uıalaryn salýǵa da basymdyq berilmek
Sońǵy on jylda 8 balabaqsha men 4 jekemenshik mektep salǵan ınvestordyń bilim uıalarynda 13 myńnan astam bala bilim alýda. Aýdanǵa jumys saparymen barǵan Túrkistan oblysynyń ákimi Ómirzaq Shókeev jeke kásipker Nızamhan Sýlaımanov salyp jatqan jańa mektepterdiń jaı-kúıimen tanysty. 1200 balaǵa arnalǵan ár mekteptiń quny 1,5 mlrd. teńgeden aspaıdy. Qańtar aıynda qurylysy bastalǵan zamanaýı úlgidegi bilim uıalary jospar boıynsha bıylǵy oqý jyly paıdalanýǵa beriledi. Oblys basshysy ınvestorǵa Túrkistan qalasynan mektep salý týraly usynys jasady. Ol alda taǵy 4 mektep salýdy kózdep otyr.
Óńir basshysy bilim salasyna úles qosyp, elge paıdaly jobalardy júzege asyryp júrgen ınvestordyń jumysyn joǵary baǵalady.
– Túrkistan oblysy demografııalyq ósim boıynsha elimizde kósh basynda. Jyl saıyn jańa mektepterge qajettilik týyndaýda. 2021 jyly bıýdjet esebinen 78 mekteptiń qurylysy júrgizilip, 44 mekteptiń qurylysy aıaqtaldy. Qalǵandary da tapsyrylady. Jeke ınvestıtsııa esebinen 37 mektep salyndy. Osy baǵytta jumysty kúsheıtken jón. Jalǵyz ózi birneshe bilim uıasyn salǵan azamattyń eńbegi maqtaýǵa turarlyq, – dedi Ómirzaq Shókeev.
Investordyń ıeligindegi 1200 oryndyq balabaqsha elimizdegi eń úlken balabaqsha bolyp esepteledi. Sondaı - aq Saıram aýdany, Qarabulaq aýylynda 2200 oryndyq orta mektep jumys isteıdi. Bilim oshaǵy Elordadaǵy Nazarbaev ýnıversıtetiniń jobasymen salynǵan. Mekteptiń úlken májilis zaldary, kitaphana, sport zaly men 450 oryndyq ashanasy bar. Óskeleń urpaqty eńbekke baýlýǵa baǵyttalǵan pánder ótiletin synyptardyń jasaqtalýy da ózgeshe.
Barlyq mektepterde balalar memlekettik baǵdarlama aıasynda aqysyz bilim alady. Oqýshylardy tegin tasymaldap, ystyq tamaqpen qamtamasyz etedi. Qosymsha úıirmeler tegin. Úzdikterge arnaıy stıpendııa taǵaıyndalǵan.
Jan basyna shaqqandaǵy qarjylandyrý júıesimen salynyp jatqan mektepter eń aldymen bıýdjet qarajatynyń jumsalýyn tıimdi etedi. Salaǵa jaýaptylar jekemenshik mektepter jelisin arttyrý arqyly memlekettik mektepterge túsetin «júkti» jeńildetýdi kózdep otyr.
Oblysta 945 mektepte 500 myńnan astam bala oqıdy. Byltyr bıýdjet esebinen 78 mekteptiń qurylysy júrgizilip, onyń ishinde 44 mekteptiń qurylysy aıaqtaldy. 30 mektepke kúrdeli jáne aǵymdaǵy jóndeý jumystary júrgizilip, 91 mekteptiń ashanasy jańǵyrtyldy.
Túrkistan qalasynda 2025 jylǵa deıin 10-nan astam mektep salynady dep josparlanýda. 2021 jyly 900 oryndyq mektep, 720 oryndyq Nazarbaev zııatkerlik mektebi 120 oryndyq jataqhanasymen salyndy. Budan bólek, 6 jekemenshik mektep paıdalanýǵa berildi.
