Túrkistan oblysynda mektep qurylysyna jaýapty sheneýnik paramen ustaldy

ASTANA. QazAqparat - Túrkistan oblysy Saıram aýdany ákimdiginiń Qurylys bóliminiń basshysy para alý kezinde ustaldy, dep habarlaıdy QazAqparat Memlekettik qyzmet isteri jáne sybaılas jemqorlyqqa qarsy is-qımyl agenttigine silteme jasap.

Oǵan qurylys kompanııasy ókilinen 12 mln teńge para aldy degen kúdik taǵyldy.

«Túrkistan oblysynyń sybaılas jemqorlyqpen kúres organdary Saıram aýdany ákimdiginiń Qurylys bólimi basshysynyń qylmystyq áreketin áshkereledi. Kúdikti Saıram aýdany Aqbaı aýylyndaǵy orta mekteptiń qosymsha korpýsynyń qurylysyna jalpy somasy 400,5 mln teńge bolatyn memlekettik satyp alý týraly kelisimshart jasaǵany úshin deldaldar arqyly bólip-bólip qarjy alyp otyrǵan», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń resmı ókili Nurlan Jahın.

Kúdikti qylmys ústinde ustalyp, qamaýǵa alynǵan.

Agenttiktiń habarlaýynsha, jemqorlyqty júzege asyrǵan deldaldarǵa da qatysty sotqa deıingi tergeý jumystary júrýde.