Túrkistan oblysynda mektep dárethanasyna kirip ketken er adam ustaldy
TÚRKІSTAN. QazAqparat – Túrkistan oblysynyń Tólebı aýdanyndaǵy mektepterdiń birinde dárethanaǵa kirgen bógde er adam ustaldy. Belgisiz adamdy beınebaqylaý kameralary arqyly kórgen ustazdar polıtsııany shaqyrtqan, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, atalǵan fakti boıynsha sotqa deıingi tergep-tekserý júrgizilýde. Ustalǵan adam orta dárejeli mas kúıinde bolǵany anyqtaldy. Ol dárethanaǵa kirgende ishinde eki oqýshy qyz bolǵan. Polıtseıler men muǵalimder jedel áreket etip, kúdiktini qolǵa túsirdi.
«Osy oqıǵa boıynsha tıisti saraptamalar taǵaıyndaldy. Qyzdardyń densaýlyǵyna esh qaýip kelmegen. Kúdikti qamaýda. Sondaı-aq tekserý kezinde er azamattyń 2002 jyldan bastap psıhonevrologııalyq dıspanserde esepte turatyndyǵy anyqtaldy», - delingen habarlamada.
Atap ótsek, atalmysh mektepte beınebaqylaý kameralary ǵımarattyń ishinde, aýlada, dárethananyń janynda jáne mektepke kireberiste ornatylǵan.
