Túrkistan oblysynda medıtsınalyq nysandar salynady
TÚRKІSTAN.QazAqparat - Túrkistan oblysynda ólim-jitim kórsetkishi 4,3 paıyzǵa tómendep, ana óliminiń kórsetkishi 35,9 paıyzǵa azaıdy. Bul týraly oblystyq Densaýlyq saqtaý basqarmasynyń basshysy Muqan Egizbaev málim etti, dep habarlaıdy QazAqparat tilshisi.
Onyń aıtýynsha, densaýlyq saqtaý salasyn aqparattandyrý boıynsha qala, aýdan ortalyqtaryndaǵy medıtsınalyq mekemeler 100 paıyz ınternetpen qamtylǵan. Aýyldyq okrýgterdi ınternetpen 2021 jylǵa qaraı tolyǵymen qamtamasyz etý josparlanyp otyr.
«Aǵymdaǵy jyly oblystyq bıýdjet esebinen 5728 kompıýter satyp alyndy. Búgingi kúnge 5728 kompıýter jetkizilip, qamtamasyz etý kórsetkishi 64 paıyzdan 100 paıyzǵa jetkizildi. Sondaı-aq, Túrkistan oblysy boıynsha 1 909 744, ıaǵnı 100 paıyz elektrondyq densaýlyq pasport jasaqtaldy. 19 220 medıtsına qyzmetkeri medıtsınalyq aqparattyq júıege oqytyldy. Qazirgi tańda 441 717 adam mobıldik qosymsha paıdalanady. Nátıjesinde elektrondyq júıeniń kómegimen 2 mln-ǵa jýyq azamat dárigerdiń qabyldaýynda bolǵan, 1 mln 783 myń adam basqa da medıtsınalyq kómekterge júgindi. 64 258 patsıentke eńbekke jaramsyzdyq paraǵy elektrondyq nusqada berildi. Odan bólek, aýdandyq, qalalyq emhanalarda 20 tsıfrlyq kómek posty ashylyp, onda 558 myńnan asa maman oqytyldy», - dedi basqarma basshysy.
Sondaı-aq, óńirde ótken jyly medıtsınalyq uıymdardyń materıaldyq - tehnıkalyq jabdyqtalýyna 8,1 mlrd teńge bólinip, 65,75 paıyzdy qurady. Statsıonarlardyń qabyldaý bólimshelerinde trıaj júıesi ornatylyp, jedel medıtsınalyq kómek qyzmetinde «Kómek» avtomattandyrylǵan basqarý júıesi engizildi. Barlyq mashınalar GPS navıgatsııamen qamtamasyz etilgen.
Aıta keteıik, aldaǵy ýaqytta Túrkistan qalalyq emhanasyn, 610 tósek orynǵa arnalǵan oblystyq kópsalaly aýrýhanany, týberkýlezge qarsy jáne onkologııalyq ortalyqtardy salý josparlanýda. Sondaı-aq oblystyq jedel járdem stansysyn jańǵyrtý kózdelip otyr.
