Túrkistan oblysynda medıtsına salasynyń mamandary marapattaldy
ShYMKENT. QazAqparat – Táýelsizdik kúnine oraı Túrkistan oblysy medıtsına salasynyń mamandary marapattaldy. Memlekettik nagradalardy oblys ákiminiń orynbasary Arman Sábıtov saltanatty túrde tabys etti, dep habarlaıdy QazAqparat tilshisi.
Saltanatty sharada dárigerler men orta jáne kishi býyn medıtsına qyzmetkerleri «Parasat», «Qurmet» ordenderi men «Eren eńbegi úshin» medalimen marapattaldy. Sondaı-aq, «Shapaǵat» medalimen jáne QR «Qurmet» gramotasymen, QR Densaýlyq saqtaý mınıstrliginiń «Qurmet» gramotasy tapsyryldy. «Eńbek ardageri» medali jáne «Densaýlyq saqtaý isiniń úzdigi», «Densaýlyq saqtaý isine qosqan úlesi úshin» tósbelgileri tabystaldy.
«Elimiz táýelsizdik alǵan 29 jyl ishinde yntymaqty uran, tatýlyqty tý ete otyryp, tolaǵaı tabystarǵa qol jetkizdik. Sonyń ishinde medıtsına salasy da qaryshtap damyp keledi. Elimizdiń densaýlyq saqtaý salasynyń damý deńgeıi ár aq halatty jannyń qosqan úlesine, bilimi men tájirıbesine baılanysty. Halyqtyń densaýlyǵy men jarqyn bolashaǵy úshin kúreste medıtsına qyzmetkerleriniń jaýapkershiligi orasan. Búkil álemdi sharpyǵan pandemııamen kúreste dárigerlerdiń tabandylyǵy osynyń aıshyqty dáleli deýge bolady»,-dedi Arman Sábıtov.
Memlekettik jáne qoǵamdyq qyzmette sińirgen eńbegi, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin usynylǵan memlekettik marapattar oblystaǵy barlyq medıtsınalyq uıymdardyń úzdikterine joldandy.
