Túrkistan oblysynda medıtsına salasynyń qyzmetkerleri marapattaldy
TÚRKІSTAN. QazAqparat - Táýelsizdik kúnine oraı Túrkistan oblysy medıtsına salasynyń qyzmetkerleri marapattaldy. Memlekettik marapattardy oblys ákiminiń orynbasary Arman Sábıtov tabys etti, dep habarlaıdy QazAqparat tilshisi.
Saltanatty is-sharada dárigerler men orta jáne kishi býyn medıtsına qyzmetkerleri Táýelsizdiktiń 30 jyldyǵyna arnalǵan merekelik medalmen, QR Qurmet gramotasymen, QR Densaýlyq saqtaý mınıstrliginiń Qurmet gramotasymen, sondaı-aq, «Eńbek ardageri» medali jáne «Densaýlyq saqtaý isiniń úzdigi», «Densaýlyq saqtaý isine qosqan úlesi úshin» tósbelgilerimen jáne alǵys hattarmen marapattaldy. Jalpy 74 azamatqa qurmet kórsetildi.
«Bıyl azattyq alǵanymyzǵa 30 jyl tolyp otyr. 30 jyl ishinde medıtsına salasy da damyp keledi. Elimizdiń densaýlyq saqtaý salasynyń damý deńgeıi ár aq jeleńdi jannyń qosqan úlesine, bilimi men tájirıbesine baılanysty. Halyqtyń densaýlyǵy men jarqyn bolashaǵy úshin kúreste medıtsına qyzmetkerlerine úlken jaýapkershilik júktelgen. Bizdiń dárigerlerimiz bul mindetti abyroımen atqaryp júr. Búkil álemdi sharpyǵan pandemııamen kúreste dárigerlerdiń tabandylyǵy osynyń aıshyqty dáleli deýge bolady»,- dedi Arman Sábıtov.
Táýelsizdik alǵan 30 jylda óńirdiń medıtsına salasynda júıeli jumystar júrgizilýde. Atap aıtsaq, sońǵy 5 jylda medıtsınalyq uıymdar 230 dana avtokólikpen, 1000 danadan asa farmatsevtıkalyq tońazytqyshtarmen, 3000 danadan asa medıtsınalyq tósek-orynmen jabdyqtaldy. 501 densaýlyq saqtaý nysany salynyp paıdalanýǵa berilgen. Onyń ishinde 42 statsıonarly aýrýhana men 459 emhanalyq-ambýlatorııalyq nysandar boı kótergen. Sonymen qatar Túrkistan qalasynda modýldik jańa úlgidegi 200 tósek-orynǵa arnalǵan aýrýhananyń qurylysy aıaqtalyp, halyq ıgiligine paıdalanýǵa berildi. Búgingi tańda, Túrkistan qalasynda halyqaralyq standarttarǵa sáıkes 570 tósek-oryndyq oblystyq kópbeıindi medıtsınalyq ortalyqtyń qurylysy júrgizilip jatyr.
