Túrkistan oblysynda medıtsına mamandary jemqorlyqpen kúres máselesin talqylady

Jaýapty hatshy densaýlyq saqtaý salasyna jaýapty mamandardyń basyn qosyp, osy saladaǵy jemqorlyqty joıý, onyń aldyn alýǵa qatysty otyrys ótkizdi, dep habarlaıdy QazAqparat tilshisi.
Jıynǵa Qoǵamdyq densaýlyq saqtaý komıteti, departament basshylary, Túrkistan, Jambyl, Qyzylorda oblystaryndaǵy aýdandarynyń basqarma basshylary, QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha departament basshysynyń orynbasary qatysty.
Basqosýda sóz alǵan Bolat Tókejanov jıyndy uıymdastyrýǵa bıylǵy jyly Qoǵamdyq densaýlyq saqtaý komıtetiniń laýazymdy qyzmetkerleriniń arasynda korrýptsııalyq faktilerdiń tirkelýi sebep bolǵanyn atap ótti. Onyń ústine óńirde halyq sany kóp, osyǵan qaraı sheshýin kútken áleýmettik máseleler de az bolmaı otyr.
Otyrysta jemqorlyqqa qarsy uıymdastyrylǵan kollegııalar men qoǵam belsendileriniń kómegimen anyqtalǵan zańbuzýshylyqtar, turǵyndar arasynda júrgizilgen nasıhat jumystary men BAQ-ta jaryq kórgen materıaldar talqylandy.
«2018 jyly Densaýlyq saqtaý mınıstrligine qarasty 806 memlekettik qyzmetker zań buzǵany úshin ákimshilik jaýapqa tartylǵan. Olardyń basym bóligi Qoǵamdyq densaýlyq saqtaý komıtetinde jumys isteıdi. Sondyqtan, sybaılas jemqorlyqpen kúresti, jemqorlyqqa qarsy monıtorıngti kúsheıtip, nátıjesin onlaın-rejımde baqylaý qajet. Buǵan qosa, jemqorlyqtyń aldyn alýda qyzmettik etıka men memlekettik qyzmettiń tártibin saqtaý da mańyzdy ról atqaratynyn eskergen jón», - dedi Bolat Tókejanov.