Túrkistan oblysynda medıtsına qyzmetkerlerine 215 mln teńgege jýyq ústemaqy tólendi
TÚRKІSTAN. QazAqparat – Túrkistan oblysynda koronavırýs ınfektsııasymen kúres júrgizip jatqan medıtsınalyq uıym qyzmetkerleriniń jalaqysyna qosymsha ústeme retinde 214 mln 837 myń tólengen. Bul týraly Áleýmettik medıtsınalyq saqtandyrý qory Túrkistan oblystyq fılıalynyń dırektory Ashat Beısenbaev málimdedi, dep habarlaıdy QazAqparat tilshisi.
Fılıal dırektorynyń aıtýynsha, Áleýmettik medıtsınalyq saqtandyrý qory óńirdegi jaǵdaıǵa únemi jan-jaqty taldaý jasap otyrady. Medıtsınalyq uıymdardy – qordyń jetkizýshilerin qarjylandyrý tıisti keste boıynsha júrgiziledi.
«Memlekettik bıýdjetten 212 myńnan 850 myń teńgege deıin bekitilgen ústeme kóleminde materıaldyq qoldaý kórsetý úshin qarajat bólindi. Bul qarajat 1 973 medıtsına qyzmetkerine tólendi. Ústemaqy alǵandardyń ishinde reanımatsııa, juqpaly aýrýlar statsıonarlarynyń dárigerleri, karantındik aımaqtaǵy orta jáne kishi býyn medıtsına qyzmetkerleri bar. Sondaı-aq, provızorlyq statsıonar jáne jedel járdem qyzmetiniń dárigerleri jáne júrgizýshiler tizimge qosylǵan», – dedi Ashat Beısenbaev.
Ústemaqy alýshylardyń tizimin jasaqtaý árbir óńirdegi shuǵyl shtabtar janyndaǵy komıssııaǵa bekitilgen. Sonymen qatar, aımaqta koronovırýs ınfektsııasymen aýyrǵan naýqastardy jatqyzý úshin 270 tósek-oryn daıyndalǵan.
«Pandemııalyq indetke uqsas klınıkasy bar naýqastardy jatqyzyp, dıagnozyn anyqtaý maqsatynda 570 tósek-orynǵa provızorlyq gospıtaldar qarastyrylǵan. Odan bólek barlyq aýdandar men qalalardaǵy ınfektsııalyq aýrýlar bólimderi daıyndalǵan. Naýqastarmen qarym-qatynasta bolǵandardy oqshaýlaý úshin oblys aýmaǵyna 1256 tósek orynǵa karantındik ortalyqtar ashylǵan. Al, tósek-orynǵa 305 924 366 teńge, PTR analızge – 60 150 828, 21 teńge qarastyrylǵan», - dedi Ashat Beısenbaev.
