Túrkistan oblysynda Májilis depýtattary jergilikti halyqpen kezdesti
NUR-SULTAN. QazAqparat - Túrkistan oblysyna QR Parlamenti Májilisiniń depýtattary jumys saparymen keldi, dep habarlaıdy oblystyq ákimdiktiń baspasóz qyzmeti.
Baıdildá Jylqyshıev, Mansurhan Mahambetov, Ýalıhan Qaınazarov, Qudaıbergen Erjan, Sáken Qanybekov jáne Muhtar Erman oblys ákiminiń birinshi orynbasary Qosman Aıtmuhametovpen kezdesti. Kezdesý barysynda óńirdiń damýy, memlekettik baǵdarlamalardyń oryndalýy sóz boldy. Parlament ókilderi Túrkistan qalasynyń ajary ashyla túskenin aıtyp, qurylys barysyna oń baǵalaryn berdi.
Depýtattar oblys ortalyǵyn aralap, «Nur Otan» partııasy Túrkistan oblystyq fılıalynyń «Open spase» formatyndaǵy qoǵamdyq qabyldaý bólmesiniń jumysymen tanysty. Partııa qyzmetkerlerimen, fraktsııa múshelerimen kezdesip, turǵyndardyń talap-tilekteri jóninde pikir almasty. El Prezıdenti Qasym-Jomart Toqaev qol qoıǵan, bıyl qoldanysqa engizilgen birneshe jańa zań jobalary týraly oı bólisti.
Óńirdiń tynys-tirshiligimen tanysýǵa arnaıy kelgen depýtattar bir apta boıy aýdan, qalalardy aralap, fraktsııa múshelerimen, saılaýshylarmen kezdesedi.
Osyǵan deıin halyq qalaýlylary Tólebı aýdanyndaǵy birqatar áleýmettik mańyzdy nysandardy aralady. Sondaı- aq, jergilikti halyqpen kezdesip, QR Parlament Májilisinde qabyldanǵan zańdar, engizilgen ózgerister men tolyqtyrýlar tóńireginde oı órbitti. Ulttyq qoǵamdyq senim keńesinde aıtylǵan ózekti máseleler, «Nur Otan» partııasynyń jumysyn jańǵyrtý jolynda atqarylýy tıis jumystar, mindetti áleýmettik saqtandyrý, jastar kadrlyq rezervi, joǵarǵy oqý oryndaryn ońtaılandyrý máselelerin túsindirdi.
Sonymen qatar, 2020 jyldan bastap beriletin ataýly áleýmettik kómektiń jańa formaty sóz etildi. Jıynǵa qatysýshylar ashyq áńgime barysynda tolǵandyratyn suraqtaryna tolyqqandy jaýap aldy.
