Túrkistan oblysynda «Máshhúr Júsip» aýyly qurylady
Túrkistan oblystyq máslıhatynyń kezekti on jetinshi sessııasynda Túrkistan oblysynyń Qazyǵurt, Otyrar jáne Saýran aýdandarynyń ákimshilik-aýmaqtyq qurylysynyń keıbir máseleleri qaraldy. «Qazaqstan Respýblıkasynyń ákimshilik-aýmaqtyq qurylysy týraly» Qazaqstan Respýblıkasy Zańyna sáıkes, oblystyq onomastıka komıssııasynyń qorytyndysy negizinde, halyqtyń pikiri eskerile otyryp, Túrkistan oblysy Saýran aýdany Eski Iqan aýyldyq okrýgi aýmaǵynan eldi meken quryp, oǵan «Máshhúr Júsip» ataýy beriletin boldy.
«Memleket basshysy Qasym-Jomart Kemeluly Qazaqstan halqyna arnaǵan Joldaýynda birqatar naqty tapsyrma berdi. Negizgi bóligi elimizdiń áleýmettik-ekonomıkalyq damýyna arnalǵan. Joldaý júktegen jaýapkershilik zor. Aldymyzda Joldaýdaǵy aıqyn baǵyttardy iske asyrý mindeti tur. Túrkistan oblysy – elimiz boıynsha halqy eń tyǵyz ornalasqan ári yntymaq-birligi jarasqan óńir. Óńirde halyqtyń ómir sapasyn jaqsartý men óńirdiń áleýmettik-ekonomıkalyq damýy boıynsha aldymyzda atqaratyn aýqymdy sharalar jetkilikti. Sondyqtan alǵa qoıǵan maqsattar men mindetterdi júıeli túrde oryndaýymyz qajet»,-dedi Túrkistan oblysynyń ákimi Darhan Satybaldy.
Jalpy sessııa jumysynda 21 másele qaraldy.
