Túrkistan oblysynda mas júrgizýshi úsh polıtseıdi kóligimen qaǵyp ketken
TÚRKІSTAN. QazAqparat – Túrkistan oblysynda qujattardy talap etý kezinde mas júrgizýshi tártipke baǵynbaı, aldynda turǵan eki polıtseıdi soǵyp ketken. Tártip buzýshyny toqtatýǵa áreket jasaǵan úshinshi polıtseıdi avtokóligimen súıreı ótken, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, oqıǵa Jetisaı aýdanynda júrgizilgen kezekti reıd kezinde boldy. Tártip saqshylary reıd barysynda qala kósheleriniń qıylysynda sebepsiz júrgen «Mercedes-Benz» avtokóligin toqtatpaq bolǵan. Alaıda ol polıtseılerdi kóligimen soǵyp, oqıǵa ornynan izin sýytqan. Saldarynan úsh polıtsııa qyzmetkeri túrli dene jaraqatyn alyp, olarǵa medıtsınalyq kómek kórsetilgen.
«Jetisaı aýdandyq PB qyzmetkerleri júrgizýshiniń kim ekenin anyqtap, ony ustaýǵa polıtsııa bóliminiń barlyq jeke quramy jumyldyrylǵan. Jedel-izdestirý sharalary barysynda júgensiz júrgizýshi ustaldy. Medıtsınalyq kýálandyrýǵa sáıkes tártip buzýshy «ortasha dárejede» mas bolǵany jáne esirtki paıdalanǵany anyqtalǵan. Oqıǵa QR QK-niń 379-baby «Bılik ókiline baǵynbaý» jáne 380-baby «Bılik ókiline qatysty kúsh qoldaný» boıynsha tirkeldi. Kúdikti qamaýǵa alynyp, onyń avtokóligi aıyp turaǵyna qoıyldy. Qazirgi ýaqytta atalǵan jaıt boıynsha sotqa deıingi tergeý amaldary júrgizilip jatyr», delingen habarlamada.
